Qaraǵandy mektepterinde oqýshylarǵa mamandyq tańdaýǵa kómektesetin pedagog paıda bolady

QARAǴANDY. QazAqparat – Qala jáne aýyl mektepterindegi oqytý sapasyn teńestirý. Qaraǵandy oblysynyń bilim qyzmetkerleriniń dástúrli tamyz keńesinde osyndaı mindet qoıyldy, dep habarlaıdy QazAqparat tilshisi.

«Mektepke deıingi bilim berý jáne oqytý baǵdarlamasyna degen kózqaras túbegeıli ózgeredi. Talap balaǵa emes, kúni boıy oıyn áreketi arqyly tárbıe sabaqtaryn ótkizetin muǵalimge qoıyldy. Baǵdarlama ár balanyń daralyǵyna baǵyttalǵan jáne sabaqqa ýaqyt belgileýden tolyǵymen bas tartady», - dedi bilim basqarmasynyń basshysy Gúlsim Qojahmetova.

Balalardyń oqý ýaqytyn jańasha uıymdastyrýǵa jáne olardyń derbestigin damytýǵa «Bir toptaǵy eki tárbıeshi» baǵdarlamasy múmkindik beredi.

Aýyl mektepterindegi bilim sapasyn arttyrýǵa «Qala – aýyl», «Jas matematık» syrttaı mektebi, «Vırtýaldy mektep» jobalary baǵyttalǵan.

Sondaı-aq, «Repetıtor» pılottyq jobasy iske qosylady.

Aýyl mektepteriniń myńdaǵan túlekteri men áleýmettik osal otbasylardyń balalary UBT-ǵa onlaın rejımde tegin daıyndalady.

Jańa oqý jylynan bastap barlyq mektepterde kásiptik baǵdar beretin pedagog shtaty engiziledi.

«Mamandyǵym – bolashaǵym» jobasy sheńberinde bolashaq mamandyǵyn qosa alǵanda, jańa kásipter atlasy ázirlenedi.

38 kolledjde birinshi jumys ornymen qamtamasyz etý úshin jumysqa ornalasýǵa járdemdesý qyzmeti engizildi.

Jyl sońyna deıin ondaı qyzmet barlyq orta kásiptik oqý oryndarynda ashý josparlanyp otyr.

Pedagogtardy qyzmettik turǵyn úımen qamtamasyz etý de jalǵastyrylýda. Ótken jyly memlekettik turǵyn úı qorynan 24 páter bólindi.

Buqar jyraý aýdanynyń Doskeı aýylynda muǵalimder alatyn kóppáterli úı jóndelýde.

Konferentsııada Y. Altynsarın tósbelgileri, «Bilim berý isiniń qurmetti qyzmetkeri», «Eńbek ardageri», «Meıirim – álemge mahabbatpen» marapaty, sondaı-aq oblys ákiminiń alǵys haty tabys etildi. Jas mamandar da nazardan tys qalǵan joq.

«Men E.A. Bóketov atyndaǵy Qaraǵandy ýnıversıtetinde grantta oqydym. Tájirıbe jınaqtaý úshin eńbek jolymdy óz mektebimde bastadym. Jastarymyz jaqsy bilim alýy úshin budan da kóp jumys isteımin. Ózime artylǵan úmitti aqtaýǵa tyrysamyn», – deıdi Osakarov aýdany Á. Bókeıhan atyndaǵy tirek mektebiniń tarıh pániniń muǵalimi Elaman Masalım.