Qaraǵandy mektebinde patrıotızm sabaǵyn ótpese de, oqýshylardy ótti dep aıtýǵa májbúrlegen - muǵalim

QARAǴANDY. QazAqparat – Qaraǵandyda №5 mekteptiń muǵalimi oqýshylarmen birge vıdeo túsirip, balalardy qoqan-loqqydan qoryqpaýǵa jáne shyndyqty aıtýǵa shaqyrady. Onyń aıtýynsha, mektepte «Patrıotızm jáne jahandyq quzyrettilik» páni ótkizilmegen. Alaıda, qujat boıynsha bul pán oqytylyp, osy saǵattar úshin muǵalimderge aqy tólengen. Mektep ókilderi bolsa oqýshylardan ol pán ótti dep aıtýyn talap etken.

Búgin áleýmettik jelide Qaraǵandy qalasy №5 mektebiniń muǵalimi túsirgen vıdeo paıda boldy.

«Maǵan 2022-2023 oqý jylynda «Patrıotızm jáne jahandyq quzyrettilik» páni oqytylmaǵany týraly aqparat keldi. Sizderge resmı túrde málimdeımin, men Jarlıkov Igor ıÝrevıch, Qaraǵandy oblysynyń oblystyq prokýratýrasyna jazbasha ótinish joldadym jáne atap ótken adamdardy jaýapkershilikke tartýdy talap etetinimdi habarladym», - deıdi beınerolıkte №5 mekteptiń tarıh pániniń muǵalimi Igor Jarlıkov.

Muǵalimniń aıtýynsha, aryz jazýynyń sebebi – muǵalimder oqýshylardy ótken oqý jylynda «Patrıotızm jáne jahandyq quzyrettilik» pánin ótkenin rastaýǵa májbúrlep otyr.

Sonymen qatar, ol muǵalimderdiń balalarǵa qoqan-loqqy kórsetkenin habarlady.

«Qazir maǵan úziliste 11-synyp oqýshylary kelip, «Igor ıÝrevıch, bizge adamdardyń aty-jónin berip, «Patrıotızm jáne jahandyq quzyrettilik» páni ótkizildi dep jazýǵa májbúrlep jatyr. Sonymen qatar olar bizdi qorqytyp otyr, eger olaı jazbasaq, jaǵdaıymyz múshkil bolady dep qorqytty» dedi. Taǵy da aıtamyn, sizderdiki ras bolsa, eshqashan qoryqpańyzdar. «Patrıotızm men jahandyq quzyrettilik» pánin oqytty degen muǵalimder alatyn jalaqy – bul sizderdiń ata-anańyzdyń, salyq tóleýshilerdiń aqshasy. Biraq qazir eń bastysy – sizder jáne sizderdiń ustanymyńyz», - deıdi muǵalim vıdeoda.

Sodan keıin ol eki mektep qyzmetkeriniń qatysýymen oqýshylardan «Bul pán shynymen oqytyldy ma?» dep suraıdy. Oqýshylardyń bári «joq» dep jaýap beredi.

Qaraǵandy oblysynyń bilim basqarmasy túsindirgendeı, qazir atalǵan mektepte arnaıy komıssııa tekserý júrgizip jatyr.

«№5 mektep muǵalimi I. Jarlıkov jarııa etken málimdemesinde atap ótken sabaqtyń shyn máninde ótken-ótpegenine qatysty málimetti prokýratýra zerdelep, tekseredi. Aıtylǵan aqparat rastalmaǵan jaǵdaıda mektep ákimshiligi bedelin qorǵaý úshin sot organdaryna júgine alady. Budan basqa, beıneótinish jazylǵannan keıingi kúnderde oqytýshynyń sabaqta bolmaýy eńbek zańnamasyn tikeleı buzý retinde baǵalanady», - dep habarlady vedomstvodan.

Oblystyq prokýratýra beınejazbany jáne muǵalimniń sózin ýákiletti organdar tekserip jatqanyn habarlady.