Qaraǵandy Medýnıversıtetinde vaktsınatsııa ortalyǵy ashyldy

QARAǴANDY. QazAqparat – Qaraǵandy Medıtsına ýnıversıtetinde qurylǵan vaktsınatsııa ortalyǵynda JOO oqytýshylaryn, qyzmetkerleri men olardyń otbasy múshelerin egý júrgizilýde. Vaktsınalaý pýnkti Bastapqy medıtsınalyq-sanıtarlyq kómek qalalyq ortalyǵynyń qoldaýymen ashyldy. Búgingi tańda 50-den asta adam egildi, dep habarlaıdy QazAqparat tilshisi.

Qaraǵandy farmatsevtıkalyq zaýytynda óndirilgen «Gam-KOVID-Vak» (Spýtnık V) vektorlyq vaktsınasynyń birinshi komponentin 50 adamnan quralǵan qyzmetkerler toby aldy. Naýqanǵa qatysýǵa sheshim qabyldaǵan qalǵan áriptester de josparly túrde egiletin bolady.

«Vaktsınatsııa – juqpaly aýrýlardyń, sonyń ishinde koronavırýstyń aldyn alýdyń eń tıimdi ádisteriniń biri. Vaktsınanyń arqasynda adam ımmýnıtetke ıe bolady, Covid-ke sezimtal bolmaıdy nemese vaktsınatsııadan keıin ol dertti jeńil ótkeredi. Sonymen qatar, vaktsınatsııa indettiń aýyr túrleri men asqynýlardyń aldyn alýǵa kómektesedi», - deıdi medıtsına ǵylymdarynyń doktory, professor, «Qaraǵandy medıtsına ýnıversıteti» KEAQ klınıkalyq jumys jónindegi prorektory Baqyt Kósherova.

Vaktsınanyń birinshi komponentin medıtsına ǵylymdarynyń doktory, professor Bıbigúl Ábeýova aldy. Ol bul sheshimdi qazirgi ýaqytta «qyzyl» aımaqqa enip otyrǵan Qaraǵandy oblysyndaǵy qolaısyz ahýalǵa baılanysty qabyldaǵan.

«Men vaktsınatsııadan óttim. Sebebi men aýyrǵym kelmeıdi. Búgingi kúni koronavırýs ınfektsııasynan qorǵaýdyń basqa senimdi ádisi joq. Ózińdi jumys isteıtin adammen qarym-qatynastan qorǵaý múmkin emes, ásirese biz, emhanalarda patsıentterdi qabyldaıtyn dárigerler, sondaı-aq aýrýhanalarda jumys isteıtinder. Ózimdi keremet sezinemin. Vaktsınatsııaǵa eń bastysy, oń kózqaraspen kelý kerek dep esepteımin, sonda bári jaqsy bolady», - deıdi Bıbigúl Ábeýova.

Egý aldynda barlyǵy mindetti túrde saýalnama toltyrady. Sondaı-aq vaktsınatsııadan keıin ózin qalaı ustaý kerektigi jáne álsizdik, dene qyzýynyń kóterilýi sekildi belgiler paıda bolǵan jaǵdaıda qaıda júginý kerektigi týraly tolyq aqparat berilgen jadynama usynylady.

Vaktsınatsııa aldynda ýnıversıtettiń árbir qyzmetkeri jiti aýrýlardyń jáne qarsy kórsetilimderdiń joqtyǵyna kóz jetkizý úshin muqııat tekserildi. Medıtsınalyq tekserýge dene temperatýrasyn, qan qysymyn, satýratsııany ólsheý kiredi.

Vaktsınalaýdan keıin árqaısysy taǵy 30 mınýt dárigerdiń baqylaýynda boldy. Ýnıversıtet qyzmetkerleri vaktsınanyń ekinshi dozasyn 21 kúnnen keıin alady. Bir táýlik qalǵanda olardyń uıaly telefonyna vaktsınanyń ekinshi komponentin alý kúni men ýaqyty týraly SMS-habarlama keledi.