Qaraǵandy máslıhatynyń depýtattary senatormen kezdesýde birqatar másele kóterdi

QARAǴANDY. QazAqparat – Parlament Senatynyń depýtaty Serik Óteshov Qaraǵandyda oblystyq jáne qalalyq máslıhattyń depýtattarymen kezdesip, óńirdiń áleýmettik-ekonomıkalyq damýynyń ózekti máselelerin talqylady, dep habarlaıdy QazAqparat Palatanyń baspasóz qyzmetine silteme jasap.

Atap aıtqanda, kenshiler astanasy men monoqalalar turǵyndarynyń ómir súrý sapasyn jaqsartý, ındýstrııalyq aımaqtardy odan ári keńeıtý, densaýlyq saqtaý jáne bilim berý, energetıka jáne turǵyn úı-kommýnaldyq sharýashylyq qyzmetteriniń tıimdiligin arttyrý máseleleri kóterildi.

Depýtat áńgime barysynda VIII shaqyrylymnyń birinshi sessııasy qyzmetiniń qorytyndylary týraly habardar etti.

«Joǵarǵy palata sessııa barysynda barlyǵy 25 zańdy maquldady. Olardyń 10-y depýtattardyń bastamasymen ázirlengenin atap ótken jón. Onyń ishinde elimiz ben halqymyz úshin asa mańyzdy «Zańsyz ıemdenilgen aktıvterdi memleketke qaıtarý týraly» zań qabyldandy. Ol Qazaqstan aýmaǵynda da, odan tys jerlerde de zańsyz satyp alynǵan aktıvterdi qaıtarýǵa, sondaı-aq múlikti zańsyz satyp alý men qarjyny elden shyǵarýǵa yqpal etken jaǵdaılardy joıýǵa múmkindik beredi», - dep atap ótti senator.

Óńirdiń memlekettik organdarynyń ókilderi negizgi áleýmettik-ekonomıkalyq kórsetkishter týraly aıtsa, jergilikti depýtattar kómek kórsetý qajet bolatyn birqatar problemany parlamentshiniń nazaryna jetkizdi.

Kezdesýge qatysýshylar aýyldardy elektrmen jabdyqtaý, joldardy jóndeý jáne qurylys materıaldary baǵasynyń qymbattaýy, bıýdjet salasy qyzmetkerleriniń jalaqysyn arttyrý, eldi mekenderdegi kommýnaldyq ınfraqurylymdy damytý máselelerin talqylady.

Senator kezdesýdi qorytyndylaı kelip, kóterilgen barlyq máseleler parlamentshilerdiń nazarynda bolatynyn atap ótti.