Qaraǵandy kommýnaldyq qyzmetkerleri kóshelerdi qardan jańa tásilmen tazartýǵa kiristi

QARAǴANDY. QazAqparat – Qaraǵandynyń kommýnaldyq kásiporyndary qala kóshelerin qardan jańa ádispen tazartýǵa kiristi. Endi belgili bir kósheler túnde jabylatyn bolady, dep habarlaıdy QazAqparat tilshisi.

Ekinshi tún qatarynan qaraǵandylyq kommýnaldyq qyzmetkerler jol men trotýarlardy qar men qar úıindilerinen tazartý úshin tańǵa deıin bir kósheni tolyqtaı jaýyp tastady. Jańa ádis týraly qala ákimi Meıram Kojýhov Instagram paraqshasynda jazdy.

«Keshe biz kóshelerdi tazalaýdyń jańa ádisin qoldanyp kórdik. Túnde Erýbaev kóshesin jaýyp, tolyǵymen tazarttyq. Búgin túnde sol ádispen Sátbaev kóshesinde qar tazalaýǵa kiristik. Endi biz qalany osylaı retke keltirýdi josparlap otyrmyz: túnde belgili bir kósheni jaýyp, joldardy, tehnıkalyq jáne jaıaý júrginshiler trotýarlaryn tazalap, qar úıindilerin shyǵaramyz», - dep jazdy qala basshysy óz paraqshasynda.

Al, jekemenshik nysandardyń irgeles aýmaǵy ýaqtyly tazalanbasa, qala ákimi kásipkerlerge aıyppul salynatynyn eskertti.

«Kásipkerler, dúkender, saýda ortalyqtary, kafeler, meıramhanalar jáne basqa nysandar ıeleri, irgeles aýmaqtardan qar shyǵarýdy umytpańyzdar! Áıtpese, aıyppul salynady. Kóktemde jertólelerden sýdy soryp almaý úshin basqarýshy kompanııalar aýlalardy tazalaýy kerek», - dep qosty Meıram Kojýhov.

Aıtýynsha, jaqyn arada kommýnaldyq qyzmetter kóktemgi sý tasqyny kezinde sý basý qaýpi bar ýchaskelerden qar shyǵarýdy bastaıdy.

Vıdeodan alynǵan kadr