Qaraǵandy kolledjderi zamanaýı kásip túrlerin oqytyp shyǵarady
Oqý ordalary qazirgi zamanǵy quraldarmen jabdyqtalǵan zerthanalar qurǵan jáne dýaldy bilim berý júıesine aýysqan. Osynyń arqasynda kolledj túlekteriniń 95% mamandyqtary boıynsha jumysqa ornalasý múmkindigine ıe bolyp otyr.
Qaraǵandy oblysynda jumysshy mamandyqtardyń bedeli arta tústi. Búginde kolledjderde bir orynǵa konkýrs 3-5 adamdy quraıdy, al oqýǵa qabyldaý 35%-ǵa artty.
Turǵyndar aldynda esep bergen óńir basshysy Erlan Qoshanov osylaı dedi.
«Búgin Indýstrııa 4.0 ekonomıkasy kadrlardy daıarlaýda ózge de tásilderdi qoldanýdy talap etip otyr. Óndiristi aýqymdy jańǵyrtý júrip jatyr, qymbat jabdyqtar satyp alynýda, jańa mamandyqtar paıda bolyp, eskileri joǵalyp barady. Osyǵan baılanysty bizdiń aldymyzda zamanaýı jáne naryqqa qajetti mamandardy daıyndaý mindeti tur, - dep atap ótti ol. - Biz jumys berýshiler jańa stanoktarda jumys isteýdi kez kelgen jumyskerge senip tapsyra salmaıtynyn túsinemiz. Biz kásiporyndarmen jumys júrgizdik, olardyń qajettiligin zerttedik, endi olardyń ózderi de oqytý isine belsene qatysýǵa daıyn».
Qazirgi tańda dýaldy bilim berýdi damytýǵa basty nazar aýdarylyp otyr. Atalmysh júıe boıynsha stýdentter ýaqytynyń 60% óndiris oshaǵynda ótkizedi.
«Ótken jyldan bastap Memleket basshysynyń tapsyrmasy boıynsha jáne iri kompanııalardyń qoldaýymen biz kolledjder janynan 9 quzyret ortalyǵyn qurdyq. Ol ortalyqtarda kásiporyndardaǵydaı jabdyqtar ornatylǵan. Sáıkesinshe, onda oqyǵan stýdentter óndiriske daıyn bolyp shyǵady», - dep túsindirdi Erlan Qoshanov.
Óńir basshysynyń aıtýynsha, mundaı tásildi qoldaný jumysqa ornalasý kórsetkishin 95%-ǵa jetkizedi, al eski ádisteme kezinde túlekterdiń tórtten biri jumyssyz qalyp otyrǵan.
Kolledjderde mamandyqtar saraptalyp, taldaý jasaldy: jańa mamandyqtar ashylyp, eńbek naryǵynda suranysy joq mamandyqtar alyp tastaldy.
«Bul sharalar kásibı bilim berýdiń tartymdylyǵy men sapasyn arttyrýǵa múmkindik berdi», - dep málimdedi aımaq basshysy.
Foto: karaganda-region.gov.kz