Qaraǵandy haıýanattar baǵy múıizi kesilip, qansyrap jatqan buǵylarǵa qatysty túsinik berdi
Keshe, 9 qyrkúıekte Qaraǵandynyń tanymal pablıkteriniń paraqshalarynda fotosýretter men vıdeolar paıda boldy.
Onda múıizi kesilgen, basynan qany aǵyp jatqan buǵylardy kórýge bolady.
Bul vıdeo qaraǵandylyqtardyń narazylyǵyn týdyrdy. Alaıda jel paıdalanýshylaryn odan buryn janýarlardyń jaǵdaıy alańdatyp otyr.
Haıýanattar baǵynyń basshylyǵy túsindirgendeı, janýarlardyń ómirine qaýip tónerdeı eshqandaı jaıt bolmaǵan – mundaı protsedýra jyl saıyn ótkiziledi jáne onyń aldynda janýarlarǵa arnaıy qaýipsiz preparat egilip, qozǵalysy shekteledi.
«Men haıýanattar baǵynda shamamen 12 jyldan beri jumys istep kelem jáne biz árqashan janýarlardyń múıizin birdeı ádispen kesip tastaımyz. Buǵy – óte jabaıy ańdar. Jyl saıyn biz erkek buǵylardyń múıizin kesemiz, óıtkeni olar agressıvti bolady. Qazir ańdarda tabıǵı juptasý kezeńi bastaldy, olardy bir-birinen qorǵaý jáne haıýanattar baǵynyń qyzmetkerleriniń qaýipsizdigi úshin múıiz kesý sharalary júrip jatyr. Keshe olar protsedýradan keıin birden vıdeoǵa túsirildi, janýar qalpyna kelýi úshin shamamen 2 saǵat ýaqyt qajet. Bul jaǵdaıda múıizder dereý arnaıy eritindimen óńdeldi. Olardy oraýǵa bolmaıdy, odan paıda joq. Olar múıizderin únemi uryp-soǵyp, dýalǵa qajap, kez kelgen tańǵyshty alyp tastaıdy. Tabıǵatta buǵy kóktemde múıizderin tastaıdy, biraq oǵan deıin olar únemi urǵashy buǵy úshin kúresedi. Olar tipti bir-birin óltirýge deıin barady. Urysta jeńilgen buǵy ketýi kerek. Biraq olar haıýanattar baǵynda, baratyn jeri joq. Sondyqtan janýarlar arasyndaǵy qaqtyǵys qaıtalana beredi. Buǵan jol bermes úshin biz múıizderdi erterek alyp tastaımyz. Búgin sizder janýarlardyń jaǵdaıy jaqsy ekenin kórip otyrsyzdar. Olar júgirip, oınap júr. Bul - mindetti veterınarlyq shara, ony barlyq haıýanattar baǵynda ótkizedi», - dep túsindirdi haıýanattar baǵynyń qyzmetkeri Amın Alın.
Haıýanattar baǵynyń dırektory Gúlnar Adambekova da kelýshiler haıýanattar baǵyna qatysty nege teris pikir aıtatynyn túsinbeımin deıdi.
Onyń aıtýynsha, sońǵy jyldary haıýanattar baǵy aıtarlyqtaı ózgerip, janýarlardyń jaǵdaıy jaqsardy.
Onyń aıtýynsha, búginde haıýanattar baǵynda 10 jyldan 30 jylǵa deıingi eńbek ótili bar qyzmetkerler jumys isteıdi.
Olardyń barlyǵy keremet mamandar jáne olardyń eshqaısysy janýarlarǵa jamandyq tilemeıdi, kerisinshe, olar ańdardyń ómir súrý jaǵdaıyn jaqsartýǵa tyrysady.
«Biz janýarlardyń ómirin jaqsartýǵa tyrysamyz. Bizdiń turaqty qonaqtarymyz saıabaqtyń qalaı ózgergeni, qanshalyqty jaıly bolǵandyǵy týraly birneshe ret aıtyp ketti. Bizdiń qyzmetkerler bul janýarlardy jaqsy kóredi jáne olarǵa zııan tıgizgisi kelmeıdi. Jańa jaǵdaılardyń arqasynda bıyl bizde birneshe jyldan keıin alǵash ret bızon tóldedi. Bul - haıýanattar baǵy úshin keremet oqıǵa», - deıdi Gúlnar Adambekova.