Qaraǵandy dárigerleri er adamdy klınıkalyq ólimnen keıin aman alyp qaldy

QARAǴANDY. QazAqparat – Qaraǵandy oblystyq klınıkalyq aýrýhanasynyń reanımatologtary 36 jastaǵy qaraǵandylyqty ólim aýzynan arashalap qaldy. Er adam medıtsınalyq mekemege klınıkalyq ólim jaǵdaıynda jetkizilgen. Ol ata-anasynyń úıinde túski as iship otyryp, bir tilim etke qaqalyp qalǵan. Nátıjesinde et demalý júıesin bitep, er adam tunshyǵyp qalǵan, dep habarlaıdy QazAqparat tilshisi.

36 jastaǵy uly tunshyǵa bastaǵanda, ákesi geımlıh ádisin qoldanǵan (joǵarǵy tynys joldarynyń bógde zatpen bitelýine alǵashqy kómek), biraq tynys alý joldaryn bosatý múmkin bolmaǵan. Otbasy jedel járdem shaqyryp, er adamdy dereý aýrýhanaǵa jetkizgen. Dárigerlerdiń aıtýynsha, oblystyq klınıkalyq aýrýhanaǵa kire beriste naýqastyń júregi toqtap qalǵan.

«Klınıkalyq ólim jaǵdaıynda pýlssiz, tynys almaı jatqan jaǵdaıda jetkizildi. Eń aldymen, onyń tunshyǵyp qalǵany belgili bolǵanyn eskere otyryp, birden tikeleı larıngoskopııa jasadyq. Tynys alý joldarynyń kireberisin jaýyp turǵan bógde zatty – et tilimin kórdik. Ony korntsangpen alyp tastadyq, sonymen qatar janama júrek massajyn bastadyq. Bóten zatty alyp tastaǵannan keıin, birden traheıa ıntýbatsııasyn jasadyq, sodan keıin onyń júregi soǵa bastady, ıaǵnı júrek qyzmeti qalpyna keldi», - dep túsindiredi oblystyq klınıkalyq aýrýhananyń reanımatolog dárigeri Aleksandr Sobıanın

Sol kúni keshke er adam esin jıyp, tańerteń ony ÓJJ apparatynan alyp tastady. Kelesi kúni naýqas bólimge aýystyryldy. Qazir ol úıine oraldy.

«Jedel járdem aýrýhanaǵa 5-7 mınýt ishinde keldi. Munda reanımatsııa bóliminen bizdi katalkamen qarsy aldy. Men dárigerlerge saýatty jáne tez áreket etkeni úshin óte rızamyn. Dárigerler ǵana emes, kishi medıtsınalyq qyzmetkerler de bizdi qoldady. Bul meniń oıymsha, mamandardyń kásibı jumysymen qosa, adamı qasıetin kórsetedi. Bólimshe meńgerýshisi Irına Aleksandrovnaǵa osyndaı dárigerleri baryna alǵysymdy aıtamyn. Ulymyzdyń bizben, otbasymen jáne balalarmen birge bolǵanyna rızamyn. Bul – úlken baqyt. Men oblystyq klınıkalyq aýrýhanaǵa, oblystyq jedel járdem stantsııasynyń reanımatsııa bólimshesine alǵysymdy bildiremin», – deıdi naýqastyń anasy Natalıa Levına

«Óńeshte turyp qalǵan kesek et úlken bolǵany múmkin jaqsy shyǵar. Sebebi odan ári óńeshtiń arǵy shaǵyna ótip, ókpege ketip qalǵan joq. Áıtpese biz ony ádettegi ádistermen ala almas edik, múmkin traheotomııa jasaýymyz kerek bolar edi. Biz bastapqyda operatsııa jasaýǵa daıyn boldyq, óıtkeni naýqasty osyndaı dıagnozben jetkizgen kezde (bul óte sırek kezdesedi) tynys alý joldarynda bóten dene baryn bildiredi. Biz traheotomııaǵa shartty túrde daıyn boldyq, biraq onyń baqytyna oraı, ota jasaýdyń qajeti bolmady», - dep tolyqtyrdy Aleksandr Sobıanın.