Qaraǵandy bıligi Amerıkanyń úzdik qalalary tájirıbesimen tanyspaq

QARAǴANDY. QazAqparat - AQSh-tyń Qazaqstandaǵy Tótenshe jáne Ókiletti Elshisi Ýılıam Mozermen kezdesý barysynda óńir basshysy Erlan Qoshanov Qaraǵandy oblysynda memlekettik-jekeshelik áriptestiktiń amerıkalyq úlgisin engizý múmkindikterin talqylady, dep habarlaıdy QazAqparat tilshisi.

«Qazir biz memlekettik qyzmetterdi damytý úshin belsendi jumys istep jatyrmyz. Oblys ortalyǵynda «aqyldy» qalanyń jobalaryn engizýdemiz. Bıyl tsıfrlandyrý baǵdarlamasy sheńberinde biryńǵaı úılestirý ortalyǵy qurylady. Mundaı tájirıbe Djordjııa shtatynyń Sendı-Sprıngs qalasynda bar. Biz onda memlekettik-jekeshelik áriptestik modeli tabysty iske asyrylyp jatqanyn bilemiz. Qalany tek 7 adam basqarady, al barlyq derlik mýnıtsıpaldyq qyzmetter básekeli ortaǵa berilgen», - dedi Erlan Qoshanov.

Ol elshiden Amerıkadaǵy úzdik shaharlar tiziminde bar qalanyń tájirıbesimen tanysýǵa múmkindik berýlerin surady. Ýılıam Mozer óz kezeginde ol aqparatpen tolyǵyraq bólisýge ýáde berdi.

AQSh elshisi Qaraǵandy oblysynyń ekonomıkalyq jáne áleýmettik salalarynda oń ózgerister baıqaǵanyn atap ótti.

«Nur-Sultannan Qaraǵandyǵa keler joldyń jaqsarǵany qýantady. Keshe men Temirtaý qalasynda boldym, metallýrgııalyq kombınat pen №16 mektepte bolyp qaıttym. Kórgenimniń barlyǵy keremet áser qaldyrdy. Bilim deńgeıi, jańa tehnologııalardyń engizilýi - barlyǵy tamasha», - deıdi Ýılıam Mozer.

Dıplomat basym bóligi Qaraǵandy oblysynyń aýmaǵynan ótetin jańa gaz qubyrynyń qurylysy sekildi aýqymdy jobanyń júzege asyrylýy óte ózekti ekenin atap ótti.

Sondaı-aq, Erlan Qoshanov AQSh elshisimen ınvestıtsııa máselesin talqylady.