«Qaraǵandy - Balqash» tasjoly qashan paıdalanýǵa beriledi
«Dál qazir «Qaraǵandy - Balqash» tasjolynda turmyz, munda uzyndyǵy 360 shaqyrym jol qaıta jóndelip jatyr. Bul tasjol buryn 2 jolaqty bolsa, endi 4 jolaqty bolyp keńeıtilýde. Bul joldyń basy Nur-Sultan qalasynan bastalyp, jol jónekeı Temirtaý, Qaraǵandy, Balqashqa deıin, odan ári Almatyǵa jalǵasady. Jospar boıynsha jóndeý jumystaryn kelesi jyly aıaqtap, 2022 jyly tolyqtaı paıdalanýǵa beremiz», - dedi «QazAvtoJol» ulttyq kompanııasynyń basqarma tóraǵasy Ulan Álip BAQ ókilderine arnalǵan baspasóz týry barysynda.
Onyń aıtýynsha, atalǵan baǵyttaǵy joldy jóndeý jumystaryna 2 merdiger kompanııa, 1 myńǵa jýyq tehnıka jáne 5 myńdaı maman tartyldy.
«Bul jobanyń tıimdiligine kelsek, aldymen jolaýshylar óz ýaqytyn únemdeıdi, sondaı-aq, Qaraǵandy oblysynyń kólik-logıstıkalyq áleýetin arttyrady. Odan bólek, kólikpen tasymaldanatyn júk aınalymynyń ulǵaıýymen qatar halyqaralyq tasymaldyń artýyna ákeledi. Atap aıtsaq, «Nur-Sultan – Qaraǵandy – Balqash» tasjolyn qaıta jańǵyrtý Ózbekstan, Tájikstan, Qytaı jáne Reseı Federatsııasyna shyǵý múmkindigin qamtamasyz etedi», - dedi ol.
Ulttyq kompanııa basshysynyń sózine sensek, «Nurly jol» baǵdarlamasy aıasynda bıylǵa deıin el kóleminde 13 myń shaqyrym jolǵa jóndeý jumystary júrgizildi. Prezıdent tapsyrmasyna sáıkes, 2025 jylǵa deıin 24 myń shaqyrym jol qaıta jóndeletin bolady.