«Qaraǵandy – Balqash» avtojolynyń rekonstrýktsııasy qashan aıaqtalady
Memleket basshysy Qasym-Jomart Toqaev Qaraǵandy oblysyna jumys sapary kezinde «Qaraǵandy – Balqash», «Balqash – Býrylbaıtal» avtojoldarynda júrip jatqan jóndeý jumystaryn aıaqtaýdy tapsyrǵan bolatyn.
«Qazirgi tańda «Qaraǵandy – Balqash» avtomobıl jolynda uzyndyǵy 363 shaqyrymǵa jetetin 8 jol ýchaskesinde jańǵyrtý jumystary júrgizilip jatyr. Atalǵan jol qurylysy bastalǵannan beri negizgi joǵarǵy qabattyń 291 shaqyrymy, tómengi qabattyń 245 shaqyrymy jáne jol jabynynyń joǵarǵy qabatynyń 7 shaqyrymyna asfalt tóseldi. Asfaltbeton jabynynyń jańa qabatymen jol qozǵalysy 277 shaqyrymǵa qamtamasyz etilip, jyldyń sońyna deıin qosymsha 10 shaqyrym avtojoldy ashý josparlanyp otyr.
Bul oraıda jol ýchaskelerinde jalpy uzyndyǵy 8 shaqyrym bolatyn 16 aınalma jol qarastyrylǵanyn aıta ketý kerek. Jyl sońyna deıin tıisti jumystardy aıaqtap, jańa jol jabynyna baılanysty qozǵalys úderisin 13 aınalma jolǵa aýystyrý josparlanyp otyr. Qalǵandarynda jol qozǵalysy qamtamasyz etiledi. Osy avtojoldy qaıta jańartý boıynsha qurylys-montaj jumystaryn 2023 jyldyń aıaǵyna deıin júzege asyrý kózdelip otyr», - delingen mınıstrlik málimetinde.
«Balqash – Býrylbaıtal» trassasyndaǵy jumystardy da jyl sońyna deıin aıaqtaý kózdelgen. Jobaǵa sáıkes munda 288 shaqyrymnyń 6 ýchaskesinde jol jabynyn tóseý júrgizilip jatyr. Jańa asfaltbeton tóselgen 161 shaqyrym jolmen qozǵalysqa ruqsat etildi.
«Jezqazǵan – Qaraǵandy» avtomobıl joly boıynsha qazir 513 shaqyrymǵa jobalyq-izdestirý jumystary júrgizilip jatqanyn atap ótken jón. Bul joba 12 ýchaskege bólingen. Jobalaý-smetalyq qujattamany ázirleýdi 2023 jyly aıaqtaý josparlanyp otyr. Qujattamanyń daıyn bolýyna baılanysty tıisti jumystar kezeń-kezeńmen bastalady», - delingen QR IIDM habarlamasynda.
Sondaı-aq Memleket basshysy jalpy uzyndyǵy 200 shaqyrymdy (17-217 shaqyrym) quraıtyn «Qaraǵandy – Qarqaraly» avtojolyn jóndeýdi aıaqtaýǵa qatysty qajetti sharalardy qabyldaýdy tapsyrdy. Osy jol ýchaskesiniń jaǵdaıyn jaqsartý maqsatynda 2021-2022 jyldary uzyndyǵy 18 shaqyrym (102-110 shaqyrym jáne 197-207 shaqyrym) jerge ortasha jóndeý júrgizildi. Kelesi jyly respýblıkalyq bıýdjet esebinen uzyndyǵy 75 shaqyrym (132-197 shaqyrym jáne 207-217 shaqyrym) jol ýchaskelesinde ortasha jóndeý júrgizý josparlanyp otyr. Joldyń qalǵan ýchaskeleri 2024 jyly aıaqtalady dep kózdelýde.