Qaraǵandy aýyldarynda mektep tapshylyǵy qalaı sheshilip jatyr

QARAǴANDY. QazAqparat – Buqar jyraý aýdanynda apatty mekteptiń ornyna 150 oqýshyǵa arnalǵan jańa mektep salý josparlanǵan. Al jumys istep turǵan oqý oryndarynda oryn jetispeýshiligi máselesin sheshý úshin olarǵa qosymsha ǵımarat salynady. Bul týraly óńirlik kommýnıkatsııalar qyzmetinde ótken brıfıngte Buqar jyraý aýdanynyń ákimi Serjan Aımaqov málim etti, dep habarlaıdy QazAqparat tilshisi.

«Gagarın aýylynda beıimdelgen eki qabatty úı-jaıda Talǵat Bıgeldınov atyndaǵy jalpy orta mektep jumys isteıdi. Bul - 120 orynǵa arnalǵan burynǵy balabaqshanyń tıptik ǵımaraty. Oǵan Sadovyı aýylynan oqýshylar jetkiziledi. Ótken jyly mektep ǵımaratyna eki qabatty japsarlas qurylystyń jobalyq-smetalyq qujattamasy ázirlendi. Qazirgi ýaqytta onyń qurylysyna bıýdjettik ótinim berildi», – dedi Serjan Aımaqov.

Sondaı-aq, bes mektepte (Tokarev, Eltaı, Nura, Kókpekti, Úshtóbe) sport, akt zaldary, ashana jáne oqý kabınetteri túrindegi qosymsha oryn qajet.

Olarda oqýshylardyń sany jobalyq qýattan asyp túsedi.

«Búgingi kúni bizdiń aýdanda apatty jaǵdaıǵa deıin ǵımarattyń tozýynyń bir jaǵdaıy anyqtaldy. Bul Novostroıka aýylyndaǵy S.T. Elgezekov atyndaǵy jalpy bilim beretin mektep. Máseleni sheshý úshin 150 oryndyq jańa mektep salý qajet. Jer telimi rásimdeldi, mektep qurylysy 2023 jylǵa josparlanǵan», – dep atap ótti spıker.

Aýdanda sondaı-aq áleýmettik osal sanattaǵy balalardy qoldaý boıynsha júıeli jumys júrip jatyr.

Jappaı oqytý qory esebinen 736 oqýshyǵa materıaldyq kómek kórsetildi.

Keńse taýarlary, sporttyq kıim jáne aıaq kıim satyp alyndy.

Jańa jylǵa az qamtylǵan otbasylardyń 70 oqýshysyna kıim satyp alýǵa 20 myń teńgege jańajyldyq syılyq pen sertıfıkat syıǵa tartyldy.