Qaraǵandy áýejaıynda Jerge oralǵan ǵaryshkerlerdi qarsy aldy (FOTO)
Qaraǵandynyń ákimi Nurlan Áýbákirov reseılik ǵaryshker Anton Shkaplerovty, Eýropalyq ǵarysh agenttiginiń astronavty Samanta Krıstoforettıdi jáne NASA astronavty Terrı Vertsty qarsy aldy.
«Sizder orbıtada uzaq ýaqyt bolyp, barlyq tapsyrmalardy jaýapkershilikpen oryndadyńyzdar. Sizderdi qonaqjaı Qaraǵandynyń jerine sátti qonýlaryńyzben quttyqtaýǵa ruqsat etińizder»,-dedi qala basshysy saltanatty qarsy alý rásiminde.
Dástúr boıynsha ǵaryshkerlerdiń ıyqtaryna qazaqtyń ulttyq kıimi - shapan men kamzol jabyldy. Budan basqa kádesyılar, ataýly matreshkalar jáne Baıqońyrdyń 60 jyldyǵyna shyǵarylǵan kitaptar syıǵa tartyldy.
Óz kezeginde ekıpaj komandıri erekshe syılyq tapsyrdy. Halyqaralyq ǵarysh stansasy Jerge qaraǵandylyq áýlıe Sevastıan ıkonymen oralǵan.
«Maǵan HǴS-qa áýlıeniń qudiretti kúshin jetkizý baqyty buıyrǵandyǵyn maqtan tutamyn. Bul ıkon kaıýtada 200 táýlik boıy menimen birge boldy, ol meni saqtady. Jáne búgingi aman-esen qonýymyzǵa shapaǵaty tıdi degen oıdamyn. Men óte baqyttymyn jáne ıkondy sizderge tabys etemin»,-dedi A. Shkaplerov Qaraǵandy jáne Shahtınsk eparhııasynyń hatshysy Vladımır ákeıge (Freıgang) ony berip jatyp.
Budan buryn habarlanǵandaı, 11 maýsymda astana ýaqytymen saǵat 19.44-te Halyqaralyq ǵarysh stansasynyń 42/43 ekıpajy Jezqazǵan qalasynan 146 shaqyrym jerde sátti qonǵan bolatyn.
Jarty jylǵa sozylǵan ǵaryshtyq vahtadan keıin reseılik Anton Shkaplerov, Eýropalyq ǵarysh agenttiginiń astronavty Samanta Krıstoforettı jáne amerıkandyq Terrı Vertst Jerge oraldy.
Olar sapar kezinde stansada ǵylymı-qoldanbaly zertteý baǵdarlamalaryn tolyqtaı atqardy jáne eki reseılik, bir amerıkandyq júk kemeleriniń jumystaryn qamtamasyz etýge qatysty.
Reseı ǵaryshkeri Gennadıı Padalka jáne Mıhaıl Kornıenko, sondaı-aq NASA astronavty Skott Kellı vahtalyq jumystar atqarý úshin HǴS bortynda qaldy.
Al jańa ekspedıtsııa ekıpajy Halyqaralyq ǵarysh stansasyna 24 shildede «Soıýz TMA-17M» kemesimen attanady .