«Qaraǵandy – Almaty» tasjolynda jolaýshylarǵa qyzmet kórsetetin 9 beket salynady

NUR-SULTAN. QazAqparat – Qazir «Qaraǵandy – Almaty» tasjoly salynyp jatyr. Jolmen qatar ondaǵy ınfraqurylymdy damytý maqsatynda atalǵan baǵytta 9 jol boıy beketi boı kótermek. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Elimizde jol boıyndaǵy ınfraqurylymdy damytý óte mańyzdy. Onyń ústine búginde ishki týrızm ilgerilep keledi, osy oraıda jol men ondaǵy ınfraqurylymnyń bolýy shart. «Qaraǵandy- Almaty» tasjolynda 9 beket salý qaralyp jatyr. Qazirgi ýaqytta ınvestorlar beket salatyn jerdi belgiledi. Jol boıy beketteri ulttyq standartqa sáıkes joǵary sanatta salynady. ıAǵnı «A» sanatynda. Ol jerde janar-jaǵarmaı quıý beketinen bólek, tamaqtaný oryndary, tehnıkalyq qyzmet kórsetý ortalyǵy jáne kempıng (avtotýrısterge arnalǵan jazǵy lager) bolady», - dedi Beıbit Atamqulov Úkimet úıinde onlaın ótken baspasóz máslıhatynda.

Sondaı-aq, mınıstr jol boıyndaǵy servısterdiń qaı ýchaskelerde ornatylatynyn aıtty.

«Atalǵan jol boıy beketteri Aqsý-Aıýly, Býrylbaıtal, Qurty jáne Qapshaǵaı jol ýchaskeleriniń boıyna ornatylady. Búginde elimiz boıynsha 120 jol boıy servısi jumys istep tur. Onyń 60-y ulttyq standartqa sáıkes keledi. Biz jergilikti atqarý organdarymen birlesip bul baǵyttaǵy jumysty jalǵastyratyn bolamyz, - deıdi ol.

Buǵan deıin vedomstvo basshysy «Qaraǵandy-Almaty» tasjolynyń paıdalanýǵa beriletin merzimin atady.