Qaraǵandy ákimi tikeleı efırde krannan aqqan sýdy iship, sapasyn synap kórdi

QARAǴANDY. QazAqparat – Qaraǵandy qalasynyń ákimi «Qaraǵandy Sý» JShS sorǵy stantsııasynda bolyp qaıtty. Qala basshysy kompanııa ókilderimen birge turǵyndar tarapynan aýyz sýdyń sapasyna qatysty shaǵymdaryn nazarǵa alyp, mán-jaıdy anyqtaý úshin stantsııanyń jumysyn tekserdi, dep habarlaıdy QazAqparat tilshisi.

Búgin Qaraǵandy ákimi Meıram Kojýhov «Qaraǵandy Sý» JShS sorǵy stantsııasynda boldy.

Sapardyń basty maqsaty – tazartý qondyrǵysy men sý tartýdyń jumysyn tekserý. Sońǵy ýaqytta qala halqy tarapynan aýyz sýdyń sapasyna shaǵymdar jıilep ketken.

Qala basshysy barlyq protsesti Instagram paraqshasy arqyly tikeleı efırde kórsetti.

Sorǵy stantsııasynyń qyzmetkerleri túsindirgendeı, qalany aýyz sýmen qamtamasyz etý úshin stantsııa táýligine 11-den 22 myń tekshe metrge deıin sý ótkizedi.

Sý Q. Sátbaev atyndaǵy kanaldan alynady. Bul - uzyndyǵy 500 km jasandy sý qurylymy.

Qala ákimine tazartý ǵımaratynda «Qaraǵandy Sý» kompanııasynyń basshysy sý tazartý kesheni boıynsha ekskýrsııa ótkizdi.

Sodan keıin olar tutynýshylarǵa jetkiziletin sýdyń dámin tatyp kórdi.

«Qaladaǵy qubyrlarǵa baratyn sýdy synap kóreıik. Árıne, Borjomı sekildi emes, biraq soǵan jaqyn», - dedi qala basshysy.

Sondaı-aq, qala ákimi keıbir turǵyndar áleýmettik jelilerde jarııalaǵan málimetti joqqa shyǵaryp, sýdyń jaǵymsyz dámi, qospa men qurttar joq ekenin atap ótti.

Esterińizge sala keteıik, «Qaraǵandy Sý» - qalany aýyz sýmen qamtamasyz etetin kompanııa.

Kásiporynda 1700-den astam qyzmetker jumys isteıdi.

Kompanııanyń ıeliginde 18 paıdalaný ýchaskesi, 15 menshikti qosalqy stantsııa jáne 96 sorǵy stantsııasy, onyń ishinde 10 káriz sorǵy stantsııasy bar.

Sýmen jabdyqtaý jelileriniń jalpy uzyndyǵy 1200 km, káriz – 800 km.

Kompanııa basshysynyń aıtýynsha, sońǵy 10 jylda 750 km sý burý jelileri jóndelgen.