Qaraǵandylyq kompanııa 140 aǵashty zańsyz kesip tastap, ornyna úı salǵan

<p>Qaraǵandyda taǵy bir qurylys kompanııasyna qatysty sot isi qaraldy. Zańsyz áreketterge barǵan qurylysshylarǵa qatysty oblystyń aýdanaralyq ekonomıkalyq soty 17,5 mln teńgege ótemaqy tóleý jáne 7200 aǵash otyrǵyzý týraly sheshim shyǵardy, dep habarlaıdy Kazinform.&nbsp;</p>

Belgili bolǵandaı, qurylys kompanııasy zań normalaryn elemesten Gúlder-1 shaǵyn aýdanynda 140-tan astam aǵashty kesip tastap, kóp qabatty turǵyn úı qurylysyn bastaǵan.

Turǵyndar men qoǵam qaıratkerleriniń shaǵymdary boıynsha QR QK 340-baby boıynsha aǵashtardy zańsyz kesý, joıý boıynsha qylmystyq is qozǵaldy.

«Ýákiletti organ seriktestiktiń jasyl jelekterdi zańsyz kesý faktisin anyqtady, mamandar olardyń sandyq, tuqymdyq quramyn, jaı-kúıi men ornalasqan jerin zerttep, jasyl jelekterdi kesýge quqyǵynyń joqtyǵy týraly akt jazdy. Qaraǵandy oblystyq máslıhatynyń H sessııasynyń sheshimimen qabyldanǵan Qaraǵandy oblysynyń qalalary men eldi mekenderiniń jasyl jelekterin kútip-ustaý jáne qorǵaý, aýmaqtardy abattandyrý qaǵıdalarymen aǵashtardy kesý «Ruqsattar týraly» Zańǵa sáıkes ýákiletti organnyń ruqsaty boıynsha júzege asyrylady», - dep habarlady aýdanaralyq ekomıkalyq sottyń baspasóz qyzmeti.

Degenmen, ýákiletti organ ruqsat berý rásimderine sáıkes qurylys kompanııasyna aǵashtardy kesýge esh ruqsat bermegeni belgili boldy. Jasyl ekpelerdi zertteý aktisimen keltirilgen zalaldyń mólsheri anyqtalyp, nátıjesinde qurylysshylar ótemdik aǵash otyrǵyzý sheńberinde 7200 jasyl jelek egýi kerek bolady.

«Belgilengen jaǵdaılarda saı, sot talapkerdiń talaptaryn qanaǵattandyrdy, seriktestikten memleket kirisine 17 356 950 teńge kóleminde keltirilgen zalaldy óndirip alý jáne Respýblıka dańǵylynan Táttimbet kóshesine deıin Qaraǵandy qalasy Sary-Arqa kóshesiniń boıynda ornalasqan gúlzar aýmaǵynda ótemdik aǵash otyrǵyzýdy mindettedi», - dep tolyqtyrdy ekonomıkalyq sottyń baspasóz qyzmeti.

Ázirge sot sheshimi zańdy kúshine engen joq.