Qaraǵandyda zoobaq qyzmetkerleri arystannyń eki kúshigin satpaq bolǵan

<p>QARAǴANDY. KAZINFORM — Qaraǵandy haıýanattar baǵynyń úsh qyzmetkeri arystannyń eki kúshigin satýǵa áreket etkeni úshin úsh jylǵa bas bostandyǵyn shekteý jazasyn aldy.</p>

Qaraǵandy qalasy Qazybek bı aýdandyq soty arystannyń eki kúshigin urlap, satpaqshy bolǵan qalalyq haıýanattar baǵynyń úsh qyzmetkerine qatysty isti qarady.

Olar ózderiniń qyzmettik jaǵdaıyn paıdalana otyryp, erekshe qorǵalatyn tabıǵı aýmaqta aldyn ala sóz baılasý arqyly Qazaqstannyń halyqaralyq sharttarymen retteletin janýardy zańsyz satýǵa áreket jasady dep aıyptaldy.

Belgili bolǵandaı, olar bul qylmysty 2023 jyldyń jazynda iske asyrýǵa áreket etken, biraq bul jaıly polıtsııa qyzmetkerleri bilip qoıǵan.

Sottalýshylardyń kinási zattaı dáleldemelermen, kýágerlerdiń aıǵaqtarymen jáne is boıynsha jınalǵan basqa da dáleldemelermen dáleldengen.

«Sot jazany jeńildetetin mán-jaı retinde myna derekterdi qarastyrdy: kelgen zalaldyń tolyq ótelýi, eki sottalýshynyń asyraýynda kámeletke tolmaǵan balalar bar, al úshinshi — 2 toptaǵy múgedek. Sottalýshylarda jazany aýyrlatatyn mán-jaı joq», — dep habarlady Qaraǵandy qalasy Qazybek bı aýdandyq sotynyń baspasóz qyzmeti.

Aıta ketý kerek, sottalýshylardyń is-áreketteri arystan kúshikteriniń qunyn anyqtaý boıynsha sot-taýar saraptamasy júrgizilgennen keıin qaıta qaralyp, zalal kólemi úlken mólsherge jatpaıtyny anyqtaldy.

Sondaı-aq jábirlenýshi tarap zalaldy tolyq kólemde óteýge jáne tatýlasýǵa baılanysty osy bap boıynsha qylmystyq isti toqtatý týraly ótinish bildirdi.

«Sot úkimimen aıyptalýshylar QR QK-niń 24-baby, 2,3,4-tarmaqtarynyń 3-339-bóligi 2-bóligi boıynsha kináli dep tanyldy jáne olarǵa 3 jyl bas bostandyǵyn shekteý túrindegi jaza taǵaıyndaldy. Sondaı-aq olarǵa 2 jyl merzimge jabaıy janýarlarmen jumys isteýge baılanysty qyzmetpen aınalysý quqyǵynan aıyrý túrinde qosymsha jaza taǵaıyndaldy», — dep habarlady Qaraǵandy qalasy Qazybek bı aýdandyq sotynyń baspasóz qyzmeti.

Sot úkimi zańdy kúshine engen joq.