Qaraǵandyda jarylystan kúıip qalǵan eki adamnyń qazirgi jaǵdaıy qalaı

<p>QARAǴANDY. KAZINFORM - Qaraǵandy oblysynyń densaýlyq saqtaý basqarmasy eki páterli turǵyn úıdegi jarylystan zardap shekken eki adamnyń jaǵdaıy týraly habarlady. Onyń biri aýyr jaǵdaıda jatyr.&nbsp;</p>

«Er adam reanımatsııaǵa jatqyzyldy. Denesiniń 40% kúıik shalǵan. Jaǵdaıy aýyr. Qyz balanyń hali ortasha aýyr. Basy men aıaqtary birneshe jerinen jaralanǵan. Aýrýhanaǵa jatqyzyldy, hırýrgııalyq kómektiń qajeti joq, konservatıvti em jasalyp jatyr», — dep túsindirdi Qaraǵandy oblysynyń densaýlyq saqtaý basqarmasy.

Eske sala keteıik, búgin tańǵy 03:30 shamasynda Qaraǵandy qalasynda eki otbasyna arnalǵan turǵyn úıde jarylys boldy.

Úıdi jylytatyn bý qazandyǵy jarylyp, saldarynan ǵımarat opyrylyp qalǵan.

TJD kúshimen úıindi astynan 1966 jyly týǵan er adam men 2008 jyly týǵan qyz bala shyǵarylyp, medıtsınalyq jedel járdem brıgadasyna berildi.

Keıin qaraǵandylyq tótenshe jaǵdaı mamandary jer úıde bolǵan jarylystyń aldyn ala sebebin aıtty.