Qaraǵandyda jańbyrdan keıin birneshe kóshe sý astynda qaldy

<p>Qaraǵandy qalasynyń birneshe kóshesi qatty jańbyrdan keıin sý astynda qaldy. Qala bıligi joldarda jınalǵan jańbyr sýyn tezirek aǵyzý úshin káriz qudyqtarynyń qaqpaǵyn ashty, dep habarlaıdy QazAqparat tilshisi.</p>

Qaraǵandyda nóser bir saǵatqa ǵana sozyldy, biraq osy ýaqyt ishinde kenshiler astanasy topan sý astynda qaldy. Jańbyrdan eń kóp zardap shekken eki ýchaske – N. Ábdirov dańǵyly men Erýbaev kóshesiniń qıylysy, sondaı-aq vokzal mańyndaǵy alań. Jaǵdaıdy jedel sheshý úshin qala bıligi sýaǵarlardyń qaqpaqtaryn ashty.

«Osy sátte qalyptasqan jaǵdaıǵa keler bolsaq. Bul jańbyr qarapaıym emes, nóser jańbar boldy. Bulttar bir saǵat boıy tónip turǵanymen, jaýyn-shashyn mólsheri keremet kóp boldy. Áleýmettik jelilerde joldarda, ótkelderde, aýlalarda basqa jerde sý jınalǵany týraly beınerolıkter jarııalanyp jatyr. Qazirgi ýaqyttaǵy jaǵdaıdy naqtylaǵym keledi. Qaladaǵy barlyq sýaǵar júıesi, osyǵan deıin biz tazalaǵan jáne qyzmet kórsetip jatqan barlyq sýaǵarlar jumys kúıinde. Bir ýaqytta osyndaı kóp mólsherde keletin sýdy bizdiń nóseraǵarlar qabyldaýǵa qaýqarsyz. Sonymen qatar, qazir sýaǵarlar qaqpaqtaryn ashý týraly sheshim qabyldandy, biraq olar sýdyń barlyq mólsherin qabyldaý úshin sál ýaqyt qajet. Sonymen qatar, keıbir jerlerde jańbyr aǵash japyraqtaryn túsirip, saldarynan qaqpaqtar bitelip qaldy. Sondyqtan barlyq qaqpaqtardy ashý týraly sheshim qabyldandy», - dep túsindirdi qala ákimi Meıram Kojýhov.

Qala basshysynyń aıtýynsha, qazirgi ýaqytta qala boıynsha jaǵdaı turaqtaldy. Ol áleýmettik jelidegi paraqshasynda ár saǵat saıyn jaǵdaıdy baıandaýǵa ýáde berdi.

Sý basqan eki ýchaskege keletin bolsaq, bul kósheler qalanyń eń tómengi bóliginde ornalasqan. Alaıda, qazirgi ýaqytta jınalǵan jańbyr sýynyń basym bóligi aǵyzyldy.

Degenmen, qala bıligi jańbyr qaıtalanatyn jaǵdaıda daıyn bolýy úshin túngi kezekshilik uıymdastyrmaq.