Qaraǵandyda elimiz boıynsha alǵash ret polıtseılerge kovorkıng ortalyǵy ashyldy
Atalǵan ıgilikti is-sharaǵa Qazaqstan Іshki ister mınıstriniń orynbasary Sáken Sarsenov qatysty.
«Barshańyzdy kovorkıng ortalyǵynyń ashylýymen quttyqtaımyn. Bul mańyzdy shara Qazaqstanda tuńǵysh ret osy Qaraǵandy oblysynda ashylyp otyr. Byltyr polıtsııa departamentiniń bastyǵy Sanjar Ádilovtiń stýdenttermen birlesip jumys isteýiniń arqasynda 16 stýdent polıtsııaǵa jumysqa turdy. Aldaǵy ýaqytta osyndaı kovorkıng ortalyqtarynyń arqasynda ishki ister mınıstrligine jumysqa kelip, qylmyspen kúresýge atsalysady degen senimimdi bildiremin», – dedi mınıstrdiń orynbasary.
Kovorkıng ortalyǵynyń basty maqsaty – oblys ortalyǵynda ornalasqan ýnıversıtetterdiń úzdik stýdentterin iriktep, oqý kezeńinen bastap, ishki ister mınıstrliginiń kópfýnktsıonaldy júıesindegi jumysymen tanystyryp, oqýyn támamdap, qolyna dıplom alǵan soń ishki ister organdaryna qyzmetke alý.
«Ózderińizge belgili, byltyrǵy jyly bizdiń zań fakýltetiniń stýdentteri qoldaryna dıplom alǵanda ishki ister organdaryna qyzmetke turýǵa sertıfıkat ta qosa berildi. Bul óte mańyzdy. Óıtkeni oqý bitirgen stýdentterimizdi biz tolyq jumyspen qamtamasyz etip otyrmyz», – dedi E.A.Bóketov atyndaǵy Qaraǵandy ýnıversıtetiniń rektory Nurlan Dýlatbekov.
Mınıstrdiń orynbasary men ýnıversıtet rektorynyń quttyqtaý sózinen keıin polıtsııanyń kovorkıng ortalyǵynyń ashylýyna muryndyq bolǵan oblystyq polıtsııa departamenti bastyǵy men basqada jaýapty mamandarǵa alǵys hattar tabystalyp, ortalyqtyń ashylý lentasy qıyldy.
Іshki ister organdarynda syńdarly jyldar boıy eńbek etip júrgen bilikti qyzmetkerler ortalyqta stýdentterdiń kásibı jáne jeke biliktiligin arttyryp, olardy polıtsııanyń jumysyna baýlıdy. Ortalyqta oqıǵa ornyna shyǵyp, qylmystyń ashylýyna birden-bir septigin tıgizetin krımınalıst mamandarynyń jumysyn jete túsinip, ony teorııa men prıaktıkada ushtastyrý maqsatynda krımınalıstıkalyq palıgon kabıneti de ashylǵan.
Álimsaqtan, jas stýdentterdi jańa múmkindikter men zamanaýı tehnologııalardy engizýge baýlý, qoǵamdyq qaýipsizdikti saqtap, qylmystyń aldyn alý maqsatynda ishki ister organdaryna qyzmetke alý úshin esigin aıqara ashqan ortalyqtyń ashylý sońynda, polıtsııa departamentiniń bastyǵy Sanjar Ádilov ýnıversıtet rektorymen memorandýmǵa qol qoıyp, ortalyqqa krımınalıstterdiń qyzmetinde qoldanatyn qobdıshasy tartý etildi.