Qaraǵandyda dárigerdiń telefonynan bomba týraly habar tústi

<p>Qaraǵandynyń medıtsınalyq mekemeleriniń birinde em alyp jatqan 17 jastaǵy naýqas &laquo;112&raquo; arnasyna qońyraý shalyp, qaladaǵy ǵımarattardyń birine jarylǵysh zat qoıylǵany týraly aıtqan, dep habarlaıdy <a href="https://kaz.inform.kz/" target="_blank" rel="noopener">Kazinform.kz</a></p>

Polisia.kz málimetine súıensek, polıtsııa qyzmetkerleri ǵımaratty jáne oǵan irgeles aýmaqty tolyǵymen tintip shyqqan. Biraq jarylǵysh zatty tappaǵan.

«Tekserý barysynda tártip saqshylary jalǵan habarlama bergen abonenttik nómirdiń ıesin anyqtady. Ol medıtsınalyq mekemeniń qyzmetkeri bolyp shyqty. Áıel telefonyn palatalardyń birindegi ústelde qaldyryp ketkenin aıtty. Muny paıdalanǵan jasóspirim bomba týraly habarlaǵan.

Qazirgi ýaqytta sotqa deıingi tergeý júrgizilip jatyr», - delingen málimette.

Eske salaıyq, terrorızm aktisi týraly kórineý jalǵan habarlaǵan tulǵa Qylmystyq kodekstiń 273-baby boıynsha 5 myń AEK-ke (1 AEK – 3450 teńge) deıingi mólsherde aıyppul tóleıdi, ne sol mólsherde túzeý jumystaryna tartylady, ne 5 jylǵa deıingi merzimge bas bostandyǵynan shekteý nemese bas bostandyǵynan aıyrý jazasyna kesiledi.

Bul qylmys túri úshin qylmystyq jaýapkershilik 14 jastan bastalady.

Sonymen qatar sot sheshimi negizinde shyǵyndar men osyndaı habarlamadan keltirilgen barlyq zalal ótelýge jatady.

Eger mundaı áreketti kámeletke tolmaǵan bala jasaǵan jaǵdaıda zalaldy óteý onyń ata-anasyna nemese zańdy ókilderine júkteledi.