Qaraǵandydaǵy energetıkalyq kollaps: Mınıstrlik tergeý júrgizedi

<p>Qaraǵandy qalasynyń energııa júıesindegi búgingi apattyń sebebin Energetıka mınıstrliginiń komıteti anyqtaıtyn bolady, dep habarlaıdy QazAqparat.</p>

«Mınıstrliktiń Atomdyq jáne energetıkalyq qadaǵalaý men baqylaý komıteti Qaraǵandy JEO-3-tegi tehnologııalyq buzýshylyqty tergeýmen aınalysady», - delingen málimette.

Vedomstvo aqparatyna súıensek, búgin «Qaraǵandy-Energotsentr» JShS-ǵa tıesili JEO-3-tiń 220 kV-tyq Ashyq taratý qurylǵysynda qysqa tuıyqtalý jáne Qaraǵandy JEO-3 pen Topar GRES baılanystyratyn 110 kV elektr berý jelileriniń odan ári shamadan tys júktelýi saldarynan atalǵan elektr stantsııalarynda generatsııanyń tolyq tómendeýi oryn aldy. Óndiristiń tómendeýine baılanysty Qaraǵandy qalasy men Qaraǵandy oblysynyń ónerkásiptik tutynýshylary boıynsha shamamen 350 MVt shekteýler engizildi.

Tótenshe jaǵdaı saldarynan qalanyń birqatar bóligi sý men jaryqsyz qaldy, ınternet baılanysy úzildi. Polıtseıler jol boıyndaǵy qozǵalysty retteýge shyqty.

Búgin Qaraǵandy oblysynyń bas shaharynda abonentterdiń basym deni jaryqsyz qalǵan bolatyn.

Óńir ákimi Ermaǵanbet Bólekbaev turǵyndarǵa málimdeme jasap, jaǵdaıdy túsindirdi.

Keıin Energetıka mınıstrligi shaharda qýat berý qalpyna keltirilgenin málim etti. 

Aıta keteıik, keshe ǵana qaraǵandylyqtar nóser jańbyr saldarynan ábigerge túsken edi.