Qaraǵandy turǵyny jeńil kóligine jylqy tıep alǵan

<p>ASTANA. KAZINFORM — Qaraǵandy oblysynda jeńil kóliktiń salonyna jylqyny tıep alǵan júrgizýshi anyqtaldy, dep jazady Polisia.kz saıty.</p>

Qaraǵandy oblysy Nura aýdanynda patrýldik polıtsııa qyzmetkerleri 11 jeltoqsanda «Nura-Temirtaý» respýblıkalyq avtojolynda Audi kóligin toqtatty.

Tekserý barysynda kólikte jylqy bolǵan.

Kólik júrgizýshisi Buqar Jyraý aýdanynyń turǵyny jylqynyń óziniki ekenin dáleldeıtin jáne ony tasymaldaýǵa qatysty eshqandaı qujat usyna almady.

— Júk pen bagajdy tasymaldaý erejelerin buzǵany úshin júrgizýshige ákimshilik hattama toltyrylyp, is materıaldary veterınarııalyq ınspektsııaǵa joldandy. Qazirgi ýaqytta polıtsııa qyzmetkerleri jylqynyń naqty ıesin anyqtap, janýardyń urlanǵan-urlanbaǵanyn tekserip jatyr, — delingen habarlamada.

Aıta keteıik, 7 qazannan beri ótip jatqan «Mal urlyǵy» jedel-profılaktıkalyq is-sharasy aıasynda Nura aýdanynda mal men et ónimderin zańsyz tasymaldaýdyń 37 faktisi anyqtaldy. Onyń 20 jaǵdaıynda júrgizýshiler ákimshilik jaýapkershilikke tartyldy.

Buǵan deıin Qaraǵandyda esirtki saýdalaǵandar ustalǵany habarlandy.