Qaraǵandy oblysynyń joldarynda 800-den astam adam qutqaryldy

<p>Qaraǵandy oblysynyń trassalarynda qutqarý jumystary jalǵasyp jatyr. TJD qyzmetkerleri áskerı qyzmetshilermen birlesip qar qursaýyna túsken adamdardy evakýatsııalaýda. Ótken táýlikte 800-den astam adam qutqaryldy, dep habarlaıdy <a href="Kazinform." target="_blank" rel="noopener">Kazinform. </a></p>

Ótken táýlikte oblystyń avtojoldarynda TJD jáne 52859 TJM áskerı bóliminiń kúshterimen qar qursaýynda qalǵan avtokólikterden 28 adam, onyń ishinde 6 bala qutqaryldy. Sondaı-aq qutqarýshylar jaqyn mańdaǵy eldi mekenderge 391 adamdy evakýatsııalady. Budan basqa jergilikti atqarý organdarymen birlesip jylytý pýnktterine 446 adam, onyń ishinde 49 balany jetkizip, ornalastyrdy. Qutqarylǵandarǵa medıtsınalyq kómek qajet bolmady.

«Abaı aýdanynda Aqbastaý aýylynan ońtústik-batysqa qaraı 20 km jerde 30 jeltoqsan saǵat 18:55-te TJD kúshimen mal izdep júrip, dalada «Nıva» avtokóligimen turyp qalǵan 4 er adamdy izdeý júrgizildi. 31.12. saǵat 04: 05-te izdeý toby joǵalǵan adamdardy Spassk aýylynan ońtústikke qaraı 20 km jerde tapty. Medıtsınalyq kómek qajet bolmady», - dep habarlady Qaraǵandy oblysy TJD baspasóz qyzmeti.

Júrgizýshilerden basqa, qutqarýshylar aqtútek boranda dalada qalyp qoıǵan shopandardy da izdedi.

«31 jeltoqsan kúni saǵat 05:10–dan bastap Buqar Jyraý aýdanynda Aqore aýyldyq okrýgindegi Josaly sharýa qojalyǵy mańynda TJD kúshimen 1953 jyly týǵan er adamdy izdestirý júrgizildi, ol Shatan qystaǵynan Josaly sharýa qojalyǵy baǵytynda atqa minip, adasyp ketti. 31 jeltoqsan kúni saǵat 10:00–de izdeý toby joǵalǵan er adamdy «Josaly» Ş/Q-nan ońtústik-batysqa qaraı 15 km jerden tapty. Medıtsınalyq kómek qajet bolmady», - dedi oblys qutqarýshylary.

TJD qyzmetkerleri Qaraǵandy oblysynyń turǵyndary men qonaqtarynan aýa raıynyń qolaısyzdyǵy týraly 112 nómirinen kelgen habarlamaǵa qulaq asýdy jáne eldi mekennen tys jerlerge shyqpaýdy suraıdy.

«Qaraǵandy oblysynyń aýmaǵynda daýyldy eskertý jalǵasýda. Osyǵan baılanysty eldi mekenderden tys jerlerge barmaýdy, jabylý oryndarynda avtojoldarda kólik quraldarynyń jınalýyna jol bermeýdi, múmkindiginshe eldi mekenderde, kempıngterde, jol boıyndaǵy kafelerde bolýdy suraımyz», - dedi qutqarýshylar turǵyndarǵa.

Aýa-raıynyń ózgerýi jáne avtojoldardyń jaı-kúıi týraly jedel aqparat «Darmen» mobıldi qosymshasynda, TJD-nyń áleýmettik jelilerdegi resmı paraqshalarynda qoljetimdi.

Barlyq oqıǵalar men TJ faktileri týraly 112 nemese (8-7212) 43-36-36, 43-37-37 telefondaryna habarlasýǵa bolady.