Qaraǵandy oblysynyń joldaryna baqylaý beketteri qoıyldy

<p>ASTANA.KAZINFORM &ndash; Qaraǵandy oblysynyń joldarynda 18 jyljymaly baqylaý beketi qoıyldy. Bul týraly oblystyq jol polıtsııasy basqarmasynyń baspasóz qyzmeti habarlady.</p>

Polıtsııa qyzmetkerleri tıisti qujattardy tekserý úshin et pen mal tasymaldaýshy kólikterdi toqtatady.

Jyl basynan beri oblysta 25 mal urlyǵy tirkelse, onyń 18-i ashylǵan. Sońǵy oqıǵalardyń biri ótken aptada Buqar jyraý aýdanynda bolyp, polıtsııa qyzmetkerleri golshteın tuqymdy sıyryn urlaǵan kúdiktini ustady. Jábirlenýshige keltirilgen shyǵyn 1 mıllıon teńgeni qurady. Atalǵan fakti boıynsha qylmystyq is qozǵalyp, tergeý amaldary júrgizilip jatyr.

Mal urlyǵynyń kóbi erkin jaıylymda jasalady, sol sebepti mal ıeleri shyǵyndy birden baıqamaı qalyp jatady.

Polıtsııaǵa erkin jaıylyp júrgen maldyń joǵalǵany týraly 17 habarlama kelip túsken. Jedel is-sharalar nátıjesinde polıtseıler 106 bas mal, onyń ishinde 56 jylqy, 12 iri qara jáne 38 usaq múıizdi mal tapty.

Qaraǵandy oblysynyń polıtsııa departamenti turǵyndardy azamattar múlkiniń saqtalýy men qaýipsizdigin qamtamasyz etýge baǵyttalǵan sharalarǵa túsinistikpen qaraýǵa shaqyrady.