Qaraǵandy oblysynyń polıtseıleri aýyl turǵynynyń bir úıir jylqysyn taýyp berdi

<p>Qaraǵandy oblysynyń polıtseıleri aýyl turǵynyna quny 12 mln teńge bolatyn 31 jylqysyn taýyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> <a href="https://polisia.kz/qaraghandy-oblysynyng-politsejleri-auyl-turghynyna-quny-12-mln-tengge-bolatyn-zhylqysyn-tauyp-berdi/" target="_blank" rel="noopener">Polisia.kz</a>-ke silteme jasap.&nbsp;</p>

Qaraǵandy oblysynyń aýmaǵynda mal urlyǵynyń aldyn alýǵa baılanysty jedel aldyn alý is-sharasy ótkizilip jatyr. Máselen Qaraǵandy oblysy Buqar-Jyraý aýdandyq polıtsııa basqarmasyna sharýa qojalyq ıesi shaǵymdandy. Ol jaıylymnan bir úıir jylqysynyń urlanǵany týraly habarlady. Oǵan keltirilgen shyǵyn kólemi 700 myń teńgeni quraǵan.

Krımınaldyq polıtsııa qyzmetkerlerimen júrgizilgen keshendi jedel-izdestirý is-sharalary barysynda osy iske qatysy bar degen kúdikpen 35 pen 40 jas aralyǵyndaǵy eki azamat ustaldy. Atalǵan derek boıynsha Qazaqstan Respýblıkasy QK-niń 188-1 babyna (Mal urlyǵy) sáıkes qylmystyq is qozǵalyp, tergeý áreketteri barysynda kúdiktilerdiń osyǵan uqsas eki qylmysqa qatysy bary anyqtaldy.

Belgili bolǵandaı, kúdiktiler osy sharýa qojalyq ıesinen 2020 jyly quny 1 mıllıon 200 myń teńge turatyn jylqysyn urlap áketse, 2022 jyly 1 mıllıon teńgeniń jylqysyn qoldy qylǵan. Eń bastysy, tártip saqshylary barlyq derekter boıynsha jábirlenýshige jylqylaryn tirideı qaıtardy.

Sondaı-aq Qarqaraly aýdandyq polıtsııa bólimine 50 jastaǵy sharýa qojalyq ıesinen aryz tústi.

Belgili bolǵandaı, osydan eki apta buryn onyń jalpy quny 11 mln 850 myń teńge bolatyn 31 jylqysy joǵalyp ketken. Alǵashynda ol jylqylaryn ózi izdep, taba almaǵan soń polıtsııaǵa aryzdanǵan.

– Kelesi kúni krımınaldyq polıtsııa qyzmetkerlerimen júrgizilgen keshendi izdestirý is-sharalary barysynda joǵalǵan úıir jylqy dalada jaıylyp júrgen jerinen tabyldy. Eki apta ishinde joǵalǵan jylqylar 80 shaqyrymǵa alystap ketip, kórshiles Shet aýdanynyń aýmaǵynda jaıylyp júrgen.

Aıta ketý kerek, jyl basynan beri polıtsııada mal men jylqyny urlaý týraly 37 ótinish tirkeldi, olar keıinnen tabyldy. Osylaısha, ótinish berýshilerge 227 jylqy, 27 bas iri qara jáne 356 bas usaq mal qaıtaryldy.

Eger mal joǵalý, urlaný bolsa, oqıǵa týraly dereý polıtsııaǵa “102” telefony arqyly habarlasýlaryńyzdy suraımyn, – dedi Qaraǵandy oblystyq polıtsııa departamenti bastyǵynyń orynbasary Ábil Ábildın.