Qaraǵandy ​​oblysyndaǵy jarylys: úıindi astynan eki adamnyń denesi shyǵaryldy

<p>QARAǴANDY. KAZINFORM — Qaraǵandy ​​oblysynyń Botaqara kentinde qutqarýshylar turmystyq gaz balonynyń jarylýy saldarynan qulaǵan úı qırandylarynyń astynan eki adamnyń denesin alyp shyqty. Oqıǵadan 5 adam zardap shekken, onyń úsheýi — bala.</p>

Eske sala ketsek, 30 qańtarda saǵat 00:07-de Buqar jyraý aýdany Botaqara kentindegi Áýezov, 8a mekenjaıy boıynsha eki qabatty, eki kireberisi bar 12 páterli turǵyn úıdiń ekinshi qabatynda ornalasqan №10 páterde jarylys boldy. Páterdiń tóbesi men qabyrǵalary tolyq opyrylyp tústi. Birinshi qabatta ornalasqan № 7 páter de qırap qaldy. Sondaı-aq tótenshe jaǵdaı kezinde birinshi qabattaǵy № 5, 6, 8, ekinshi qabattaǵy № 11, 12 páterler jartylaı zaqymdanǵan. 

Turǵyn úı 2014 jyly salynǵan. Jalpy aýdany — 510 sharshy metr. Munda 46 adam turady, jarylys kezinde 35 adam bolǵan.

«Saǵat 00:11-den 03:37-ge deıingi aralyqta júrgen qutqarý jumystary kezinde qırandylar astynan qaza bolǵan eki adamnyń denesi shyǵaryldy. Jaraqat alǵan bes adam túrli dene jaraqattarymen Buqar jyraý aýdandyq aýrýhanaǵa jetkizildi, onyń úsheýi — bala. 25 azamatqa jedel psıhologııalyq kómek kórsetildi», — dep habarlady oblystyq TJD baspasóz qyzmetinen. 

Tótenshe jaǵdaılar departamentinde 8-7212-517223 nomeri boıynsha jedel jeli iske qosyldy. 

Oqıǵa ornynda jedel shtab quryldy. Jumysqa 139 adam men 32 tehnıka jumyldyrylǵan.