Qaraǵandy oblysyndaǵy dala órti: áýe kemeleri órt oshaqtaryna 30 ret 50 tonnadan astam sý tókti

<p>ASTANA. KAZINFORM &ndash; QR Tótenshe jaǵdaılar mınıstrliginiń baspasóz qyzmeti Qaraǵandy oblysynda tutanǵan dala órtine baılanysty tyń málimetterdi jarııalady.</p>

Baspasóz qyzmetiniń habarlaýynsha, búgin saǵat 18:30-daǵy aqparat boıynsha Aıyr, Shóptikól, Qyzylshilik, Atantaı, Terekti eldi mekenderine qaýip joq.

Tótenshe jaǵdaılar vıtse-mınıstri Erlan Nurpeıisov qazir Qaraǵandy oblysynda.

Dalalyq órt sóndirý shtabtary jumysyn jalǵastyrýda, ol jerde TJD basshylyǵy bar.

«Ashyq aýmaqta aldyn ala aqparat boıynsha aýdany 35 myń gektar qurǵaq shóp janyp jatyr. Qatty ekpindi jel, taýly jerler jáne órt oshaqtaryna kiretin joldardyń bolmaýy órtti sóndirý jumystaryn qıyndatýda. Órtti sóndirýge Qaraǵandy oblysy TJD jáne jergilikti atqarýshy organdarynyń kúshteri men quraldarynan 386 adam, 64 tehnıka, QR TJM men Qorǵanys mınıstrliginiń áýe kemeleri jumyldyrylýda. Tabıǵı órtti sóndirýge jumyldyrylǵan kúshter men quraldar 4 jaýyngerlik ýchaskege bólindi. Áýe kemeleri órt oshaqtaryna barlyǵy 30 ret 50-den astam tonna kóleminde sý tókti», - delingen habarlamada.

Sondaı-aq onda Ulttyq ulan, Kývskıı ormanshylyǵynan, jergilikti atqarýshy organdardan, Qaraǵandy jáne Aqmola oblystary TJD, QR TJM 52859 áskerı bóliminen qosymsha kúshter men quraldar jiberilgeni aıtylady.

Qarqaraly aýdanynda 2 jyljymaly tamaqtaný pýnkti daıyndaldy, azyq-túlik jáne zattaı jaraqtar qamtamasyz etildi. Sonymen qatar Qaraǵandy oblysy TJD 8 721 2 51 72 23 jedel jeli telefony jumys isteıdi. Qaraǵandy jáne Pavlodar oblystarynyń shekara aýmaǵyndaǵy órttiń jalpy aýdany 45 myń ga qurady.

Osyǵan deıin Baıanaýylda órt shalǵan jerlerdiń aýmaǵy 10 myń gektarǵa jetkennin jazdyq.

Sondaı-aq Kaspıı teńiziniń jaǵalaýyndaǵy 5 gektar aýmaqta qamys órtenip jatqanyn jazdyq.