Qaraǵandy oblysynda sý tasqynynan zardap shekkenderge birjolǵy materıaldyq kómek kórsetildi

<p>QARAǴANDY. KAZINFORM - Qaraǵandy oblysy Shet aýdanynda sý tasqynynan zardap shekken otbasylarǵa 100 aılyq eseptik kórsetkish mólsherinde birjolǵy materıaldyq kómek berildi. Zardap shekken otbasylar 369 200 teńgeden aldy, dep habarlaıdy Kazinform tilshisi.</p>

Osy aptada olar tolyq zalaldy óteı bastaıdy, baǵalaý komıssııasy jumysty aıaqtap, qorytyndy daıyndaıdy. Sondaı-aq osy aptada mal shyǵynyna baılanysty másele sheshiledi.

Bul týraly Shet aýdanynyń ákimi Muhıt Muhtarov habarlady.

«Zaqym kelgen úılerdiń ornyna basqasyn satyp alý nemese úı salý máselesi qarastyrylýda. Zardap shekken halyqtyń jaǵdaıyn jedel qalpyna keltirý boıynsha barlyq qajetti sharalar qabyldanyp jatyr. Olarǵa 369 200 teńge kóleminde birjolǵy materıaldyq kómek kórsetildi», - dep málimdedi aýdan ákimi.

Sondaı-aq, oblys ákimdiginde eldi mekenderdi sý tasqynynan qorǵaýdyń odan ári sharalary talqylandy.

TJD bastyǵy Murat Qatpanov 2015 jyldan 2023 jylǵa deıingi jeti jyl ishinde oblysta respýblıkalyq Jol kartasy jáne oblystyq ınjenerlik jumystar jospary boıynsha sý tasqynyna qarsy is-sharalardyń úlken kólemi júrgizilgenin eske saldy.

«274,1 km qorǵanys bógetteri men bilikteri turǵyzyldy jáne nyǵaıtyldy, 259,8 km ózen arnalarynyń jaǵalaýyn nyǵaıtý, túbin tereńdetý, túzetý, keńeıtý jáne tazartý jumystary oryndaldy, 104,3 km sý burý arnalary ornatyldy jáne nyǵaıtyldy, 309 jol ýchaskesinde sý ótkizý qabileti ulǵaıtyldy, 68,1 km drenaj júıeleri salyndy jáne jóndeldi. Osy is-sharalardyń barlyǵy, kúrdeli jaǵdaıǵa qaramastan, ózen arnalaryna sýdyń kóp túsýi, ásirese Sarytóbe, Mustafın, Chkalov, Sadovoe, Nurataldy, Qyzylqoı, Qaraǵaıly, Kertindi, Tassýat, Nura jáne basqa da kóptegen eldi mekenderde apatsyz ótkizip jiberýge múmkindik berdi», – dep atap ótti Murat Qatpanov.

Bıylǵy sý tasqyny sabaqtaryn eskere otyryp, josparlardy túzete otyryp, jumystar jalǵasady. Jolaýshylar kóligi jáne avtomobıl joldary basqarmasynyń basshysy Maqsut Qojanovtyń aıtýynsha, joldardyń 72 ýchaskesine sý ótkizý qubyrlaryn ornatý qajet.

«Shynynda da, kóp jumys jasaldy, sondyqtan biz úlken sýdy ótkize aldyq. Biraq bizde qıyndyqtar bar. TJD-ǵa aýdandar men qalalardyń ákimdikterimen birlesip taǵy da ınjenerlik jumystar josparyn jasap, ony jazǵy kezeńde iske asyrýǵa kirisýdi tapsyramyn. Bul jumysty jalǵastyramyz», – dedi oblys ákimi Ermaǵanbet Bólekpaev.

Tabıǵı resýrstar jáne tabıǵat paıdalanýdy retteý basqarmasyna barlyq bógetter men gıdroqurylystardyń tehnıkalyq jaı-kúıin qaıta tekserý tapsyryldy.