Qaraǵandy oblysynda sý basqan úılerde jóndeý jumystary bastaldy

<p>ASTANA. KAZINFORM &ndash; Qaraǵandy oblysy Shet aýdanynyń sý tasqynynan zardap shekken turǵyndary jóndeý jumystaryn júrgizip, jańa úılerge ornalasa bastady. Oblys ákimi Ermaǵanbet Bólekpaev aýyl turǵyndaryna baryp, erigen sýdan kóp zardap shekken aımaqtardy aralap kórdi.</p>

Shet aýdanynda sý tasqynynan zardap shekkenderge memleketten 100 AEK kóleminde birjolǵy kómek der kezinde tólendi. Sondaı-aq aýyl turǵyndary búlingen múlikteri úshin ótemaqy aldy. Qyrylǵan maldyń aqysy óteldi. 54 úı jóndeýdi qajet etedi. Ony turǵyndar óz kúshterimen jasaıdy. Bul jumys úshin ótemaqy tólendi. Zaqymdalǵan alty úıdiń ornyna bes úı satyp alyndy, taǵy bir úı salynady. Otbasylar jańa baspanaǵa kóshýde. E.Bólekpaev jaǵdaıdy sol jerge baryp baǵalady. 

Natalıa Fegıleniń Krasnaıa Polıanadaǵy úıi apatty dep tanyldy. Oǵan basqa úı satyp alyndy, áıel men onyń kúıeýi zattaryn kóshirýde.

«Sý 30 naýryzda keldi. Zatymyzdy jınap, maldy alyp shyǵýymyz úshin aldyn ala eskertkeni jaqsy boldy. Kóp zatymyz saqtaldy. Qazir eski úıdegi múlikti alyp, jańasyna ornalasyp jatyrmyz. Shaǵyn jóndeý jumystaryn júrgizemiz. Maǵan bári unaıdy, munda bizde bolǵannan kóp bólme bar. Tez arada ótemaqy bergenińiz úshin raqmet! Endi tynysh ómir súremiz dep senemin», – dedi aýyl turǵyny.

Aqsý aýylynda da zardap shekkenderge qosalqy qurylystary bar jaqsy úıler satyp alynǵan. Orynbek Jumajanov Aqsý qalasynda 90-jyldardan beri turady. Onyń úıine bıyl qatty zaqym kelgen. Jańa úıdi ózi tańdady. 

Foto: Qaraǵandy oblysy ákimdigi

«2015 jyly da osyndaı jaǵdaı bolǵan, biraq ol kezde bizdiń úıge zaqym kelgen joq. Bıyl ol jaramsyz bolyp qaldy. Bizge jańa úıdi ózimizge tabýǵa ruqsat etildi, biz tańdadyq. Otbasymyz úlken. Áıelim ekeýmiz zeınetkermiz. Ulymyz bizben birge turady. Onyń tórt balasy bar. Qıyn jaǵdaıda jalǵyz qalmaǵanymyzǵa óte qýanyshtymyz», – dedi O.Jumajanov.

Aqsýdyń taǵy bir turǵyny Aıdana Bıkeı de sý tasqyny saldarynan baspanasyz qaldy.

«Bizdiń úıdi qatty sý basyp qaldy. Ol áreń tur, kirý qorqynyshty. Barlyq múlikten aıyryldyq. Otbasymyzda tórt balamyz. Úıdi ózimiz tańdadyq. Jaqsy, úsh bólmeli úı, jaqynda kóshemiz. Sý tasqynymen belsene kúresip, kómekteskenderdiń barlyǵyna myń alǵys», – dedi A.Bıkeı.

Oblys ákimi aýyl turǵyndaryna jańa baspanalarynda aman-saý júrýin tiledi. 

Foto: Qaraǵandy oblysy ákimdigi

«Prezıdent tapsyrmasy boıynsha biz barlyǵyna ótemaqy tólep, tezirek úı alýǵa tyrystyq. Búgin men zardap shekkendermen jeke kezdesip, barlyq tapsyrystyń oryndalǵanyna kóz jetkizý úshin keldim. Jańa úılerińizde jaıly ómir súretinińizge senemin. Barlyq jaqsylyqty tileımin!» – dedi oblys basshysy.

E.Bólekpaev Sherýbaı-Nura ózeniniń arnasyn da aralap kórdi. Sý qoımasyn tazartý josparda bar.