Qaraǵandy oblysynda eki shahterdiń qaza bolý faktisine qatysty qylmystyq is qozǵaldy

<p>QARAǴANDY. KAZINFORM &mdash; Qaraǵandy oblysynda &laquo;Saıaq-3&raquo; shahtasynyń eki qyzmetkeriniń qaza bolý faktisi boıynsha qylmystyq is qozǵaldy. Sondaı-aq, eńbek ınspektsııasy arnaıy komıssııa qurdy, dep habarlaıdy Kazinform agenttiginiń tilshisi.</p>

Qaraǵandy oblysynyń polıtsııa departamenti «Saıaq-3» shahtasy qyzmetkerleriniń qaza bolý faktisi boıynsha qylmystyq is qozǵady.

«Saıaq-3» shahtasynda bolǵan oqıǵaǵa baılanysty Qazaqstan Respýblıkasy Qylmystyq kodeksiniń 277 babynyń 2 tarmaǵyna sáıkes, ıaǵnı abaısyzda adam ólimine nemese ózge de aýyr zardaptarǵa ákep soqqan taý-ken nemese qurylys jumystaryn júrgizý kezinde qaýipsizdik qaǵıdalaryn buzý deregi boıynsha qylmystyq is qozǵaldy. Qazirgi ýaqytta polıtsııa qyzmetkerleri oqıǵanyń mán-jaıyn anyqtaý boıynsha keshendi tergeý áreketterin júrgizýde», — dep habarlady Qaraǵandy oblysy PD baspasóz qyzmeti.

Sondaı-aq, qaıǵyly oqıǵanyń mán-jaıyn zertteıtin komıssııa quryldy.

«Qazaqstan Respýblıkasynyń eńbek zańnamasy sheńberinde QR EHÁQM memlekettik eńbek ınspektsııasy Komıtetiniń Qaraǵandy oblysy boıynsha departamenti sanıtarııalyq-epıdemıologııalyq baqylaý ókiliniń, sondaı-aq jumys berýshiniń ókilderiniń qatysýymen „Balqashtsvetmet“ ÓB „Qazaqmys korporatsııasy“ JShS (Saıaq kenishi) qyzmetkerlerimen bolǵan toptyq jazataıym oqıǵaǵa arnaıy tergeý júrgizý úshin jazataıym oqıǵany tergeý jóninde komıssııa qurdy», — dep túsindirdi eńbek ınspektsııasy departamentiniń baspasóz qyzmeti.

Arnaıy tergeý jumystary arqyly atalmysh jazataıym oqıǵanyń mán-jaılary men sebepteri anyqtalatyn bolady.

Esterińizge sala keteıik, «Qazaqmys» kompanııasyna tıesili «Saıaq-3» shahtasynda kómirtegi gazy shyǵyp, nátıjesinde shahtanyń eki qyzmetkeri qaza tapty.