Qaraǵandy oblysynda belgisiz aýrýdan jylqylar qyrylyp qaldy

<p>QARAǴANDY. KAZINFORM - Qaraǵandy oblysy Buqar Jyraý aýdany Tórtkól aýylynda jylqylar qyrylyp jatyr. Janýarlarda irińdi jara dermatıti paıda bolyp, aýrý jylqylar kóp uzamaı ólip jatyr. Belgisiz ınfektsııany anyqtaý úshin synamalar alyndy, dep habarlaıdy Kazinform agenttiginiń tilshisi.</p>

Áleýmettik jelilerde mal ólimi týraly rolıkter paıda boldy. Beınedegi jylqy ıesi janýarlardyń aıaǵyndaǵy irińdi jarany baıqaǵan. Bul jaralar jylqynyń búkil denesine tarap ketedi eken. Aýdannyń veterınarlyq ınspektsııasy taldaý úshin synama aldy. Qazirgi ýaqytta mamandar sol synamalardyń nátıjesin kútip otyr.

«Tórtkól aýylyndaǵy jaǵdaı boıynsha epızootııalyq lımfangıtke tán belgileri bar úsh jylqydan synamalar alynyp, zertteý úshin zerthanaǵa jetkizilgenin habarlaımyz. Aýrýdyń bul túrine negizinen jylqylar pen esekter shaldyqqysh keledi. Bul aýrý tek osy janýarlardyń túrlerine tán», - dedi «Qaraǵandy oblysynyń veterınarııa basqarmasy» MM basshysy Qaırbek Tursynbekov.

Sondaı-aq, óńirdiń veterınarlyq qyzmeti epızootııalyq lımfangıt dıagnozy rastalsa, Tórtkól aýylynda karantın rejımi engiziletinin málim etti. Belgilengen karantındik rejım sheńberinde aýrý nemese qyrylǵan janýarlar tárkilenip, joıylady. Sondaı-aq, zańnama sheńberinde qoldanylatyn naryqtyq qun mólsherinde ótemaqy tólenetin bolady.

Aýrý janýarlardyń ıeleri atap ótkendeı, mundaı ınfektsııa buryn kórshi aýylda rastalǵan. Osy eki aýyldyń maldary bir jaıylymda jaıylady eken. Ol kezde lımfangıt dıagnozy rastalyp, qyrylǵan jylqylardyń ıelerine ótemaqy tólengen.