Qaraǵandy oblysynda aýyl medıtsınasynyń damý áleýeti qandaı

<p>ASTANA. KAZINFORM &mdash; Qaraǵandy oblysyndaǵy aýyldarda 14 jańa medıtsınalyq nysan ashyldy. Bul týraly óńir basshysy Ermaǵanbet Bólekpaev málimdedi.</p>

«Prezıdent medıtsınalyq qyzmet kórsetý sapasyn arttyryp, ár naýqasqa erekshe kóńil bólip, densaýlyq saqtaý júıesin qaıta qurý mindetin qoıdy, – dep atap ótti Ermaǵanbet Bólekpaev. — Jyl sońyna deıin aýyldyq jerlerde taǵy 27 medıtsınalyq nysan ashylady. Al kelesi jyly 51 densaýlyq saqtaý mekemesi boı kóteredi. Temirtaý men Balqash qalalaryndaǵy eki aýrýhana qaıta jańǵyrtylǵannan keıin aýdanaralyq aýrýhanaǵa aınalady. Bul oblys turǵyndaryna medıtsınalyq kómek qoljetimdi bolady degen sóz».

Oblys basshysynyń aıtýynsha, aımaqta bilikti medıtsınalyq kadrlarǵa qoldaý kórsetilip jatyr. Sońǵy eki jylda 236 medıtsına qyzmetkeri baspanaly boldy. Memleket tarapynan berilgen járdemaqy kómeginiń mólsheri 1,5 mıllıonnan 8,5 mıllıon teńgege deıin artty. Búginde 63 mamanǵa qoldaý kórsetildi. Jyl sońyna deıin taǵy 20 medıtsına qyzmetkerine kómek kórsetý josparlanyp otyr.

Pýlmonologııa, kombýstıologııa jáne kardıologııaǵa arnalǵan qural jabdyqtar satyp alýdy «Qazaqstan halqyna» qory qarjylandyrady.

Aıta keteıik, Qaraǵandy oblysy eldiń jumysshy mamandyqtar daıyndaý ortalyǵyna aınalmaq.

Sondaı-aq, Qaraǵandy oblysynda 1 myń shaqyrymnan astam jol jóndelgeni habarlandy.

Odan bólek, oblys ákimi Saranda jańadan salynǵan jylý qazandyǵy nege tolyq jumys istemeı turǵanyn túsindirgen edi.