Qaraǵandy oblysynda 650 ýchaskede referendým ótip jatyr

<p>QARAǴANDY. KAZINFORM &ndash; Qaraǵandy oblysynda atom elektr stantsııasyn salý máselesi boıynsha referendým 650 ýchaskede ótip jatyr. Bul kúni tizimde tirkelgen 760 myńnan astam turǵyn daýys bere alady, dep habarlaıdy Kazinform tilshisi.</p>

Ýchaskelerdiń negizgi bóligi tańǵy 7:00–de ashyldy jáne 20:00–ge deıin jumys isteıdi. Biraq keıbiri óz jumysyn bir saǵat buryn tańǵıa 6:00–de bastady. Bul kásiporyndardaǵy vahtalyq jumys ádisimen jáne áskerı bólimderdegi qyzmettiń ereksheligimen baılanysty. Oblys boıynsha osyndaı 10 ýchaske bar — Qaraǵandy, Shahtınsk, Temirtaý, Qarqaraly jáne Nura aýdandarynda.

Múgedektigi bar adamdar úshin jaǵdaılar qamtamasyz etildi, olar úshin ınvataksı qyzmeti uıymdastyryldy. Ýchaskelerde pandýstar men arnaıy jabdyqtalǵan kabınalar qarastyrylǵan. Estý qabileti nashar adamdarǵa sýrdoaýdarmashylar kómektesedi.

Foto: Aızada Aǵylbaeva/Kazinform

Sonymen qatar Qaraǵandy oblysynda bul kúni qala mańyndaǵy jáne qala ishindegi marshrýttardaǵy barlyq jolaýshylar úshin jol júrý tegin bolady. Bul adamdardyń saılaý ýchaskelerine jetýin jeńildetý úshin jasalyp otyrǵan qadam, dep habarlady Jolaýshylar kóligi jáne avtomobıl joldary basqarmasy.

Referendým ótkizýge 664 komıssııa: oblystyq, aýmaqtyq jáne ýchaskelik komıssııalar jumyldyryldy.

Daýys berý protsesin táýelsiz baqylaýshylar — qoǵamdyq birlestikterdiń ókilderi qadaǵalaıdy.

Esterińizge sala keteıik, bıýlletende bir ǵana suraq bolady: «Siz Qazaqstanda atom elektr stantsııasynyń qurylysymen kelisesiz be?» degen.