«Qaraǵandy – Balqash» tasjoly qashan tolyǵymen ashylatyny belgili boldy

<p>QARAǴANDY. KAZINFORM - 2019 jyldan bastap sozylyp kele jatqan Qaraǵandy-Balqash tasjolynyń qurylysy bıyl aıaqtalýy tıis edi. Alaıda qazir joldyń tek 173 shaqyrymy ǵana tolyq ashyldy. Qalǵan bóligi el ıgiligine qashan beriledi degen suraq áli de kópshilikti alańdatýda, dep habarlaıdy Kazinform tilshisi.</p>

Jyl basynda óńirge arnaıy kelgen QR Úkimet basshysy qurylysty bıyl aıaqtaý kerektigin tapsyrǵan bolatyn. Qazirgi tańda asfalt tóseý jumystary aıaqtalǵan. Biraq 200 shaqyrymǵa jýyq joldyń tek 2 jolaǵy ǵana istep tur.

«Bir jaǵymen ǵana júremiz. Munda tek eki jolaq. Baratyn jerińe joǵary jyldamdyq qosyp tez jetiń keledi. Biraq qarama-qarsy kólikter shyǵa keledi. Jol apatynyń bári sodan bolyp jatyr. Jóndeý jumystary bitken sııaqty, nege ashpaı jatqanyn... Ashyp berse jaqsy bolar edi, - deıdi júrgizýshi Erkeulan Toıboldın.

Atalǵan jolda apat ta az emes. Eki jolaqty ýchaskelerde júrgizýshiler erejeni jıi buzady. Sonyn kesirinen bıyl 79 jol apaty bolyp, 47 adam qaza tapqan. Búginde tosqaýyl bolatyn, qardan qorǵaıtyn jáne mal ótkizbeıtin qorshaýlar salynýda. Jol qurylysynyń sapasy zerthana mamandarynyń nazarynda.

«Qazirgi tańda 363 km joldyń 173 km ashtyq. Qalǵanyn aıdyń sońyna deıin ashamyz. Aýa raıyna baılanysty jumystar keshigip jatyr. Biraq asfalt jumystary aıaqtaldy, endi abattandyrý ǵana qaldy, - dep túsindirdi «Qazavtojol» UK» Qaraǵandy oblysy fılıaly dırektorynyń orynbasary Aıbek Amantaev.

Bul jolmen táýligine 30 myńnan astam avtokólik ótedi. Belgilengen jospar boıynsha qurylys bıyl qarasha sońyna deıin aıaqtalýy kerek. 363 shaqyrym tasjolǵa 317 mıllıard teńge bólingen.