«Qara qabylan: Vakanda jasasyn!» blokbasteri kınoteatrlarda qazaq tilinde kórsetiledi

ASTANA. QazAqparat - Qazaqstanda Marvel kınoáleminiń jankúıerleri «Qara qabylan: Vakanda jasasyn!» fılmin qazaq tilinde kóre alady, dep habarlaıdy QazAqparat QR Mádenıet jáne sport mnıstrliginiń baspasóz qyzmetine silteme jasap.

Mádenıet jáne sport mınıstri Dáýren Abaev kınokartınanyń premerasynda elimiz álemdik deńgeıdegi sapaly kontentti qazaq tilinde usyný baǵytynda úlken jumys atqarǵanyn atap ótti.

«Qazaq tilindegi kınokartınalarǵa suranys artyp keledi. Halyqqa reıtıngi joǵary fılmderdi qazaq tilinde kórsetý – ıdeologııalyq turǵydan da asa mańyzdy. Osy maqsatta biz gollıvýdttyq jańa týyndylardy ana tilimizge dýblıajdaý boıynsha arnaıy jobany qolǵa alǵan edik. Tilge degen eń úlken qoldaý – ony qoldaný. Búginde ana tilimizde sóıleıtin jastar da, ony úırengisi keletin ózge ult ókilderiniń de qatary artyp keledi. Sondyqtan qazaqtildi kontentti birge damytaıyq», - dedi Dáýren Abaev.

Aıta keteıik, «Qara qabylan: Vakanda jasasyn!» - Marvel stýdııasynyń qazaq tilinde shyǵarǵan jetinshi fılmi.

10 qarashadan bastap 16 jastan asqan kórermender blokbasterdi elimizdiń barlyq kınoteatrlarynda kóre alady.