«Qara búrkit» túrmesinde sottalǵan adamnyń aı saıynǵy kútimine 181 myń teńge jumsalady

QOSTANAI. QazAqparat - Qostanaıdaǵy «Qara búrkit» túzetý mekemesinde asa aýyr qylmys jasap sottalǵan bir adamnyń aı saıynǵy kútimine memleket bıýdjetinen 181 myń teńge jumsalady, dep habarlaıdy QazAqparat tilshisi.

Aıta keteıik, «Qara búrkit» kolonııasynda ómir boıyna bas bostandyǵynan aıyrylǵandar, ıaǵnı jeke tulǵaǵa, qoǵamdyq qaýipsizdik pen tártipke qarsy asa aýyr qylmys jasaǵandar jazasyn óteıdi.

Qostanaı oblystyq qylmystyq atqarý júıesi departamenti ókilderiniń málimetinshe, «Qara búrkitte» qazirgi kúni 180 adam otyr.

Onyń árqaısynyń aı saıynǵy kútimine 181 myń teńge bıýdjet qarjysy jumsalsa, barlyq jazasyn óteýshilerge aıyna 32 mıllıon 580 myń teńge bólinedi, dep habarlaıdy massaget.

Sottalǵandardyń bir kúndik rejımine úsh mezgildik tamaqtandyrý kiredi. Tipti kúnine bir ret taza aýada serýendeýge ýaqyt beriledi.

Sonymen qatar arnaıy tártipke saı jaqyndarymen telefonmen baılanysýǵa, kezdesýge, mádenı is-sharalarǵa qatysýǵa múmkindikteri bar.