«Qara býra» Nurdáýlet Jarylqapov el chempıony atandy

AQTAÝ. QazAqparat - Mańǵystaýlyq «Qara býra» Nurdaýlet Jarylqapov 10-12 qazanda Atyraýda qazaq kúresinen ótken erler men áıelder arasyndaǵy el birinshiliginde chempıon atandy, dep habarlaıdy QazAqparat tilshisi.

Jarysqa elimizdiń 17 oblysy pen Astana, Almaty, Shymkent qalasynan kelgen 700-den astam balýan 3 kún boıy boz kilemde kúresti.

Erler arasynda 55-100 keli jáne odan joǵary, al áıelder arasynda 48-77 keli men odan joǵary salmaq dárejesinde balýandar anyqtaldy.

Nurdaýlet Jarylqapov 100 keliden joǵary salmaqta beldesti. Alǵashqy aınalymda bos bolyp, ekinshi aınalymda pavlodarlyq sporshyny jeńdi.

Odan soń almatylyq balýandy, sonymen qatar bıylǵy «Qazaqstan barysynyń» qola júldegeri Ǵalymjan Qyryqbaıdy jeńip, aqtyq beldesýge joldama aldy.

Sheshýshi kezeńde qyzylordalyq sportshyny utyp, el chempıony atandy.

«Jalpy jarys joǵary deńgeıde ótti. Biz tyńǵylyqty daıyndaldyq. Osynyń aldynda belbeý kúresinen Ózbekstan eline álem chempıonatyna baryp kelgen. Sol jerde jaraqat alyp edi. Sol jaraqatyn ýaıymdaǵanbyz. Alaıda jaqsy kúresip, Qazaqstan chempıonatynda jeńimpaz boldy», deıdi Nurdáýlet Jarylqapovtyń jeke bapkeri, oblystyq ulttyq sport túrleri ortalyǵynyń basshysy Qaırat Býrbasov.

4-6 qarashada elordada ár salmaqta reıtıngte segizdikte turǵan 8 balýan beldesedi. Ár salmaq boıynsha jeńimpaz atanǵan balýanǵa 10 000 AQSh dollarynan beriledi.

Sol jarysta jeńgen balýandar jeltoqsannyń 16-18 kúni Astanada qazaq kúresinen álem chempıonatyna joldama alady.