Qar, jel: Taǵy eki avtojolda qozǵalys toqtatyldy

<p>Kún raıynyń buzylýynan taǵy eki avtojolda qozǵalys shekteldi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;QazAvtoJol kompanııasyna silteme jasap.</p>

Atap aıtqanda, qar men jol boıynyń kóriný nasharlyǵyna baılanysty «Kókshetaý – Rýzaevka» kúre jolynyń eki ýchaskesi jabyldy. Birinshi ýchaske – Aqmola óńiriniń shekarasynan Rýzaevka aýylyna deıin (SQO terrıtorııasy). Ekinshi ýchaske – Kókshetaý qalasynan SQO shekarasyna deıin (Aqmola oblysynyń terrıtorııasy).

Eske salaıyq, búgin keshke, saǵat 20.00-den bastap Aqmola oblysynda «Kókshetaý – Atbasar» trassasynda kóliktiń barlyq túrine qozǵalysqa tyıym salyndy.

Sondaı-aq saǵat 22.00-den «Astana – Kókshetaý» avtojolynda («Astana – Şýchınsk – Kókshetaý») shekteý engizý josparlanyp otyrǵany aıtylǵan bolatyn.

Búgin SQO-da alǵashqy qar jaýǵanyn jazǵan edik.

Sınoptıkter, erteń, 23 qazanda kún raıynyń buzylýyna baılanysty 17 óńirde eskertý jarııalady.