Qar kóshkininen qaza tapqan Almaty oblysynyń týmasyn aqtyq saparǵa shyǵaryp saldy
26 jasynda taǵdyry qyrshynnan qıylǵan Álisherdiń artynda jary jáne uly qaldy. Erteń marqumnyń Aısultan esimdi balasy 1 jasqa tolady.
«Artynda ańyrap anasy, jary, uly jáne baýyr etteri ezilip baýyrlary qaldy. Bul apat búkil halyqtyń basyna túsken qaıǵy. Buǵan qazaq jeriniń qıyr-qıyryndaǵy azamattardyń báriniń de qabyrǵasy qaıysty. Elimizdiń tynyshtyǵyn qorǵaýda Otanyna qyzmet etip, paryzyn adal atqarǵan ofıtser Álısher Qyryqbaıulynyń jatqan jeri jaıly bolsyn», dep Qaratal aýdanynyń ákimi Qaırat Bısembaev kóńil aıtty.
Álisher otbasynda úsh aǵaıyndy. Tasqyn jáne Aıdyn esimdi aǵalarynyń jolyn qýyp, áskerı salany tańdaǵan. Almatydaǵy áskerı ınstıtýtty bitirgen jas ofıtser birden Jambyl oblysyndaǵy 91678 áskerı bólimine jóneltilgen. Osy jaqta otbasyn qurǵan. Ekstrımaldy alpınızmmen shuǵyldanyp, talaı shyńdardy baǵyndyrǵan. 2016 jyly 2-5 maýsym kúnderi Astanada ótken «Áskerı-tehnıkalyq quraldar men qarýlardyń» IV Halyqaralyq «KADEX-2016» kórmesiniń Qurmet gramotasymen marapattalǵan. Marqumdy aqtyq saparǵa shyǵaryp salýǵa birge qyzmet etken áriptesteri de keldi.
«Bul jaǵdaıda kóp qarýlas dosymyzdan aıyrylyp qalýymyz múmkin edi. Eger de osy topty basqarǵan ofıtserimiz Álisher Qyryqbaıuly óziniń sheberligimen ekstremaldy jaǵdaıda tez sheshim qabyldap, ózderiniń denelerimen topty bir jerge uıymdastyryp, ústinen qorshap jatyp, ózderi sheıit boldy» - dedi 91678 áskerı bóliminiń ókili Ardaq Satanov.
Esterińizge sala keteıik, 17 aqpan kúni Jambyl oblysynda tótenshe jaǵdaı oryn aldy. Kóksaı shatqalynda áskerı qyzmetshilerdiń oqý-jattyǵý jospary qaıǵymen aıaqtaldy. Qar kóshkini júrip, tabıǵı apat saldarynan 7 adam qaza taýyp, 16 adam zardap shekti.