Qapshaǵaıdyń balyǵyna Reseı erekshe qyzyǵýshylyq tanytyp otyr

QAPShAǴAI. QazAqparat - Ekologııa, geologııa jáne tabıǵı resýrstar mınıstrligi Almaty oblysy Qapshaǵaı qalasyndaǵy «Kaz Organic Product» tsıkldy balyq óndirisi keshenine baspasóz týryn ótkizdi. Kásiporynnyń ereksheligi - ekologııaǵa zııan keltirmeıtin óndiris tsıkly jasalǵan, balyqqa arnalǵan azyq pen otyrǵyzý materıaldary keshenniń óz ishinde daıyndalady.

Joba azamattardyń ómir sapasyn jaqsartý faktory retinde QR óndiristik qaýipsizdik baǵdarlamasyna tolyq sáıkes keledi.

BAQ ókilderi kásiporyndy aralap, afrıkalyq klarıýs, tılapııa jáne avstralııalyq qyzyl shymshýyrly shaıandy jabyq sýda ósirý protsesimen tanysty. Naryqqa shyǵarylatyn qaıta óńdelgen balyq ónimderi kórsetildi.

Kásiporyn basshysy Alekseı Şetının zaýyttyń qýaty jylyna tiri jáne qatyrylǵan 10 myń tonna balyq óndirýge jetetinin atap ótti. Zaýyttyń ereksheligi sol, basseınde balyqty 6 aıda dernásilden bastap 1 kg taýarlyq salmaqqa deıin ósirip, 1 jylda eki ret ónim alýǵa bolady.

«Qazir Úkimet halyqtyń kóbirek balyq ónimderin tutynýyna kóńil bólýde. Bul óndiris qýatyn arttyrýǵa áserin tıgizedi. Tiri balyqty da, qaıta óńdelip uzaqqa saqtaýǵa arnalǵan ónimdi de kóbeıtý kerek. Biz óndiriske akvamádenıettiń 10-ǵa jýyq zamanaýı túrin engizdik. Mármár klarıýsyn, tılapııa jáne avstralııalyq shaıan ósirýdemiz. Bıyl 2000 tonna ónim ótkizýdi josparlaǵanbyz. Pandemııaǵa josparymyzǵa azdap ózgeris engizdi»-, dedi A. Şetının.

Onyń sózinshe, 70 adam jumys isteıtin zaýytta qoldanylatyn zamanaýı tehnologııalar men kún saıyn sýdyń ekspertızasyn ótkizetin zerthana ónimniń ekologııalyq taza bolýyn qamtamasyz etedi.

«Ónim satylmas buryn ózimizde jáne qaladaǵy zerthanada tekseriledi. Jemdi Qazaqstanda jasalǵan taza ıngredıentterden ózimiz daıyndaımyz»,- dedi ol.

Maman Qazaqstan sý resýrstarynda jyl saıyn 600 myń tonna balyq ósirý úshin akvamádenıetti qarqyndy damytý qajet dep sanaıdy.

«Búgingi tańda Úkimet ár aımaqta balyq sharýashylyǵy boıynsha negizgi problemalar men usynystardy jınaýda. Sonyń negizinde balyq óndirýshilerdi qoldaý boıynsha Zańdarǵa ózgeris engizilý kerek. Aıta ketetin bir problema - salada maman jetispeıdi. Biz óz qyzmetkerlerimizdi shetelde oqyttyq. Endi ınstıtýttarmen bizde jastardyń tájirıbe almasýy jóninde, birlese maman daıyndaý boıynsha kelisip jatyrmyz»,- dep aıtty kásiporyn basshysy.

Kásiporyn ónimderi ishki naryqtan bólek Reseıge eksporttalady.

«Qazaqstandyq ónim tabıǵı taza, hımııalyq qospasy joq bolǵandyqtan Reseı joǵary baǵalaıdy. Sondyqtan halyqaralyq naryqta da uıalmaı maqtana alamyz. Balyqtyń 15 túrli ónimin daıyndaımyz. Klarıýstyń ereksheligi - ony allergııasy bar adamdarǵa da jeýge bolady. Pandemııa kezinde koronavırýspen aýyrǵan adamdar jatqan aýrýhanalardyń ratsıonyna enip, biz balyq jetkizip turdyq»,- dep atap ótti kásiporynnyń qoǵammen baılanys menedjeri.

Eske salsaq, Memleket basshysy Qasym-Jomart Toqaev halyqqa joldaýynda balyq sharýashylyǵyna erekshe mán berý kerektigin aıtqan. 2019 jyly elimizdiń balyq jáne balyq ónimderi naryǵynyń jalpy kólemi 66 myń tonnany qurady. Qazaqstandaǵy sý resýrstary 600 myń tonnaǵa deıin balyq ósirip, eksportty 10 esege arttyrýǵa múmkindik beredi.

Sol sebepti qazir Ekologııa mınıstrligi sharýalardy qoldaý maqsatynda birqatar zańdarǵa ózgeris engizip, sýbsıdııa berý joldaryn qarastyryp jatyr.