«Kapıtan Qazaqstan» komıksiniń tusaýy kesildi
Jıynǵa Májilis depýtattary, mınıstrlikterdiń ókilderi, zııaly qaýym, saıasattanýshylar, sarapshylar, blogerler, jastar uıymdarynyń kóshbasshylary qatysty.
«Búginde álem jurtshylyǵynyń aldynda turǵan mańyzdy máseleniń biri – kez kelgen sheshimdi durys qabyldaý, oılaný, ony jańasha formatta usyna bilý. Óz basym, komıksqa qaraǵanda mangany kóp oqımyn. Máselen, «Narýto», «Ataka tıtanov» syndy mangalar – osy salada silkinis jasaǵan jobalar. «Narýtonyń» paıda bolýy Japonııada jastar arasyndaǵy óz-ózine qol jumsaý oqıǵalaryn aıtarlyqtaı azaıtty. Sondyqtan, mundaı týyndylar qoǵamǵa aýadaı qajet», – dedi partııa Hatshysy Dáýlet Káribek.
Óz kezeginde, Senat depýtaty Gennadıı Shıpovskıh kreatıvti ındýstrııany damytýdyń máni men mańyzyn atap ótip, komıksterdiń urpaq tárbıesine qosar úlesine toqtaldy.
«Búgin biz otandyq kreatıvti ındýstrııanyń damýyna qatysty tarıhı sátke kýá bolyp otyrmyz. Osy máseleni Parlament Májilisi qabyrǵasynda da kótergen edim. Atalǵan salany áli de órge súıreý qajet. Sebebi, árbir komıkstiń tárbıelik máni, jas urpaqqa berer ózindik paıdasy bar. Komıks qaharmandary – ádette patrıotızmniń, adamgershiliktiń, izgiliktiń jarshysy. Olar syn saǵatta Otan úshin, eli men jeri úshin jan qııýǵa ázir turady. Sondyqtan, tek komıksti ǵana emes, jalpy kreatıvti ındýstrııany damytýǵa barynsha mán berý qajet», – dedi halyq qalaýlysy.
Al «Kitap.kz» jobasynyń avtory, medıasarapshy Maqpal Jumabaıdyń aıtýynsha, el jastarynyń shyǵarmashylyq, zııatkerlik áleýeti óte joǵary. Tipti, sheteldik jobalarǵa qatysyp júrgen qazaqstandyq jastar da bar.
«Komıks – qoǵamdyq mádenıetti qalyptastyrady. Ókinishke qaraı, otandyq komıkster óte az. Saýsaqpen sanarlyq. Bul – elimiz úshin múldem jańa sala, tyń qadam dese de bolady. «Kapıtan Qazaqstan»-dy elimizde jaryqqa shyqqan saıası taqyryptaǵy tuńǵysh komıks deýge tolyq negiz bar. Tipti, bul eńbekke tek balalar ǵana emes, eresekter qaýymy da qyzyǵýshylyq tanytady degen senimdemin», – dedi Maqpal Jumabaı.
Atalǵan týyndynyń avtory – partııa janyndaǵy Qoǵamdyq saıasat ınstıtýtynyń bas sarapshysy Erlan Ahmedı. Bul onyń alǵashqy týyndysy emes. Buǵan deıin onyń «21 ǵasyr shesheni. 77 keńes» kitaby jáne «Vlast. Seryı kardınal» atty saıası romany jaryq kórdi.
«Búgin tusaýy kesilip otyrǵan komıkstiń nobaıyn oqýshy kezimde jasaı bastadym. «Marvel»-diń, «DC»-diń kınosyn, mýltfılmderin kórip óstim. Zamanaýı Qazaqstannyń qaharmany, saıasatkeri qandaı bolýy kerek dep kóp oılandym. Onyń jemisi – osy «Kapıtan Qazaqstan». Ol otbasylyq qundylyqtarǵa basymdyq berip, otansúıgishtikti, ádilettilikti tý etedi. Biz jas otandastarymyzdy durys baǵytta tárbıeleýimiz kerek», – dedi Erlan Ahmedı.
Aıta keteıik, komıkstiń bas keıipkeri Dinmuhammed Qasymhan kúndiz ádilettilikti tý etetin saıasatker, túnde ádiletsizdikpen kúresetin sýperqaharman – «Kapıtan Qazaqstan». Komıksti Astana qalasyndaǵy «Alash» jáne «Abaı» dúkenderinen satyp alýǵa bolady.
Sýretti túsirgen: Álı Ǵalym