Daıyndyǵym óte jaqsy, babymdamyn — short-trekshi Erasyl Shyńǵyshan

<p>ASTANA. KAZINFORM. Búgin Ońtústik Koreıanyń Kanvon qalasynda ótetin jasóspirimder arasynda IV Qysqy olımpıada oıyndaryna ulttyq qurama oıynshylaryn resmı shyǵaryp salý rásimi ótti. Osy oraıda IV qysqy jastar Olımpıadasynyń ashylý saltanatynda elimizdiń kók týyn ustap shyǵatyn sportshylarymyzdyń biri — short-trekshi Erasyl Shyńǵyshanmen shaǵyn suhbat alýdyń sáti tústi.</p>

— Erasyl, jańa ǵana Týrızm jáne sport mınıstriniń qolynan elimizdiń kók baıraǵyn aldyń. Qandaı sezimdesiń?

— Bul men úshin úlken abyroı ekenin aıtqym keledi. Sondaı-aq maǵan júktelgen zor mindet dep bilemin. Sál qobaljý da joq emes. Olımpıada oıyndarynda elimizdiń baıraǵyn qalaı kóterip shyqsam, jarystarda jeńis tuǵyrynan kórinip, elimizdiń týyn solaı jelbiretip qaıtý — basty armanym. Jalpy, Týymyzdy alyp shyǵý — meni jeńiske jeteleıdi degen úmittemin.

— Olımpıada oıyndarynda Týdy kez kelgen sportshyǵa senip tapsyra salmaıdy. Osy oraıda tańdaý qalaı ózińe túskenin aıtyp ótseń?

— Negizi, Olımpıada oıyndarynda elimizdiń Týyn alyp shyǵamyn degen oıymda bolmaǵan. Osylaı tańdaý jasalǵanyn bapkerimnen estigende ne aıtarymdy bilmeı qaldym. Eń bastysy osyǵan deıingi jetistikterimdi eskere otyryp, sondaı-aq aldaǵy oıyndardan zor úmit kútetindikten tańdaýdyń biri maǵan buıyrǵan bolar dep oılaımyn.

— Osyǵan deıin qandaı jetistikterge qol jetkizdiń?

— Short-trekten sport sheberine kandıdatpyn. Óz qurbylastarym arasynda Qazaqstan chempıony atandym. Sondaı-aq halyqaralyq jarystarda da úzdikter qatarynan kórinip kele jatyrmyn. «Azııa balalary-2023» halyqaralyq jarysynda kúmis júldeger atandym. Basqa da jarystarda jaqsy nátıje kórsetip kelemin. Endi Olımpıada oıyndarynda júlde alǵym keledi.

— Daıyndyǵyń qalaı?

— Olımpıadaǵa sońǵy oqý-jattyǵý jıyndaryn Astanada «Alaý» muz saraıynda ótkizdik. Daıyndyǵym óte jaqsy. Qazir babymdamyn dep aıta alamyn.

— Short-trek sportymen aınalysqaly qansha ýaqyt boldy?

— Short-trekpen aınalysyp kele jatqanyma bıyl týra 7 bolady. Bul sport túriniń barlyq qyr-syryn meńgerip meńgerip boldyq. Endi tek jarystarda elimizge medal syılaý ǵana qaldy.

— Bul Olımpıadada basty qarsylastaryń qaı eldiń sportshylary bolýy múmkin?

— Eń basty qarsylastarymyz árıne muzaıdyn ıeleri, ıaǵnı koreıalyqtar ekeni daýsyz. Sondaı-aq qytaılyqtar da biz úshin myqty qarsylas atana alady. Jalpy, Olımpıadaǵa barǵan barlyq komandalar — bizdiń eń myqty qarsylastarymyz.

— Beıjiń Qysqy Olımpıadasynda sportshylar Ulttyq qurama formasynyń sapasyz ekenin aıtqany esimizde. Al sizderge berilgen forma týraly ne aıta alasyz?

— Bul forma maǵan qatty unady. Yńǵaıly, jeńil, jyly eken. Túsi de kóńilimnen shyqty.

— Áńgimeńe rahmet! Jeńispen oralýlaryńyzdy tileımiz!