Kanvon-2024: Olımpıadashylarymyz Ońtústik Koreıaǵa jetti

<p>ASTANA. KAZINFORM &ndash; Búgin qazaqstandyq jasóspirim olımpıadashylarymyz baıraqty doda ótetin Ońtústik Koreıanyń Kanvon qalasyna aman-esen baryp qondy.</p>

Qazirgi tańda sportshylarymyz ózderine arnalǵan qonaq úılerge jaıǵasýda.

Esterińizge sala keteıik, keshe Astana tórindegi Jaqsylyq Úshkempirov atyndaǵy Jekpe-jek saraıynda sportshylardy Olımpıadaǵa saltanatty túrde shyǵaryp salý rásimi ótken bolatyn.

Olımpıada oıyndarynyń alaýy 19 qańtar kúni tutanady. Kanvon provıntsııasynyń Kannyn qalasynda ótetin jyldyń basty jarysynda Qazaqstan jasóspirimder quramasy sapynda 42 sportshy 5 sport túrinen baq synap, 55 júlde jıyntyǵyn sarapqa salady.

Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha synǵa túsedi.

Kanvondaǵy qysqy jasóspirimder Olımpıadasy 1 aqpan kúni máresine jetedi. Atalǵan jarysqa álemniń 50 memleketinen 1 800 sportshy qatysady. 7 sport túrinen (15 dıstsıplına) 81 medal jıyntyǵy sarapqa salynady.

Olımpıadanyń ashylý saltanatynda Qazaqstan týyn konkımen júgirýden Petropavldan ulttyq quramanyń múshesi Krıstına Shýmekova men oraldyq short-trekshi Erasyl Shyńǵyshan alyp shyǵady.