Kanvon-2024: HOK prezıdenti Olımpıada medaldarynyń dızaınyn jasaǵan jigitti marapattady

<p>SEÝL. KAZINFORM &ndash; Ońtústik Koreıanyń Kanvon qalasynda ótetin IV qysqy jasóspirimder Olımpıadasynyń jeńimpazdary men júldegerlerine beriletin medaldar jıyntyǵynyń dızaıny boıynsha baıqaýda jeńimpaz atanǵan brazılııalyq azamatqa HOK prezıdenti Tomas Bah estelik medaldar jınaǵyn tabys etti.</p>

Bul týraly Gangvon-2024 jasóspirimder qysqy Olımpıada oıyndaryn uıymdastyrý komıteti resmı túrde jarııalady.

Aıta keteıik, osyǵan deıin jasóspirimder arasyndaǵy IV qysqy Olımpıada oıyndarynyń júldegerlerine beriletin medaldiń ataýy — «Jarqyraǵan bolashaq» ekenin, sondaı-aq, medal dızaıynyn kimniń jeńip alǵanyn jazǵan bolatynbyz.

Olımpıada medaliniń dızaınyn jasaýǵa arnalǵan baıqaýǵa 120 memleketten 3000-nan astam úmitker qatysqany, solardyń arasynan tek 27 jastaǵy Brazılııa azamaty Dante Akıra Ývaıdyń týyndysy úzdik dep tanylǵany belgili boldy.

Búgin Kanvon qalasynda Halyqaralyq Olımpıada komıtetiniń (HOK) prezıdenti Tomas Bah altyn, kúmis jáne qola medaldardyń estelik jınaǵyn tabys etti. HOK prezıdenti Ývaıdy «Jarqyn bolashaq» degen atpen baıqaýǵa qosqan jumysy úshin alǵysyn bildirdi.

«Medal keremet! Ol naǵyz olımpıadalyq sport túrin jáne olımpıadalyq qundylyqtardy dızaınǵa abstraktili túrde aýdarady. Men buǵan óte qýanyshtymyn jáne sportshylardyń tek medal jeńip alǵanyna ǵana emes, sondaı-aq shabyttandyratyn jáne keremet medaldi jeńip alǵanyna da qatty qýanatynyna senimdimin», - dedi HOK prezıdenti.

Óz kezeginde «Osy medaldar jıyntyǵyn HOK prezıdentinen alý - keremet sát! Men úshin qurmet, bul men úshin óte erekshe sát», - dedi Ývaı.

Eske sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi.