Qańtardaǵy tártipsizdik kezinde Semeıde «Tıgr» arnaıy kóligi urlanǵan

NUR-SULTAN. QazAqparat – Bıyl qańtarda Semeı qalasynda «Tıgr» arnaıy kóligi urlandy. Bul týraly Ortalyq kommýnıkatsııalar qyzmetinde Bas prokýratýranyń 1-qyzmet basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Qańtar oqıǵasy kezeńinde Shyǵys Qazaqstan oblysynyń eki iri qalasynda agresıvti 2500 adam men polıtsııanyń qaqtyǵysy bir ýaqytta bolǵanyn atap ótkim keledi. Nátıjesinde, 5 qańtar kúni Semeı qalasynyń ákimdigi basyp alyndy, 12 polıtsııa avtokóligi zaqymdandy, «Tıgr» arnaıy kóligi urlandy. 124 polıtsııa qyzmetkeri men Ulttyq gvardııanyń áskerıleri dene jaraqattaryn aldy», - dedi E. Qılymjanov.

Onyń aıtýynsha, Óskemen qalasynda shabýyldaýshylar ákimdiktiń, Halyq bankiniń, «Sýlpak» dúkeniniń ǵımarattaryna, kommertsııalyq nysandarǵa jáne 10 qyzmettik avtokólikke zaqym keltirdi. «Beket-2» statsıonarlyq polıtsııa beketi joıyldy.

«Osy kezeńde oblysta 7 adam qaza tapty. Polıtsııa ǵımarattarynda qaza bolǵan 3 azamatqa qatysty tergeýdi Bas prokýratýranyń arnaıy prokýrorlary júrgizip jatyr. 4 adamnyń máıitine qatysty derekterdi polıtsııa organdary tergeýde», - dedi Bas prokýratýra ókili.

Budan buryn habarlanǵandaı, Qańtar oqıǵasy boıynsha tergeý organdarynyń is júrgizýinde 5 041 qylmystyq is bar.

Sonymen qatar E.Qılymjanov qańtar oqıǵasy kezinde Almaty oblysynda 16 adam qaza bolǵanyn naqtylady.