Qańtardaǵy oqıǵalar: Jelide jedel járdem men órt sóndirýshilerge shabýyldaǵan vıdeo tarady

NUR-SULTAN. QazAqparat – Jelide qańtardaǵy oqıǵa kezinde tártipsizdikke qatysýshylardyń jedel járdem jáne órt sóndirý kólikterine shabýyldaǵan vıdeosy paıda boldy, dep habarlaıdy QazAqparat tilshisi.

Kadrdan qoldaryna taıaq ustaǵan adamdardyń órt sóndirý kóliginiń terezesin syndyryp, onyń jolyna tosqaýyl qoıyp jatqany jáne júrgizýshini shyǵaryp almaq bolǵan sátin kórýge bolady. Dál sondaı jaǵdaı jedel járdem kóligimen bolǵan.

Buǵan deıin jelide Almatyda polıtseıler men áskerılerge shabýyldaǵan jańa vıdeo taraǵan bolatyn.

Eske salaıyq, 1 qańtarda Mańǵystaý oblysy Jańaózen qalasynda saǵat 17:20-da qala ákimdiginiń aldynda turǵyndar jınaldy. Olar el basshylyǵyna vıdeoúndeý jasap, suıyltylǵan gaz baǵasyn túsirýdi surady. Sol kúni saǵat 18:00-de adamdar tarady.

Sodan keıin 2 qańtarda narazylyq bildirýshiler sany birneshe júzdegen adamǵa artty, al aktsııaǵa qatysýshylar ishki joldy japty. Quqyq qorǵaý organdary kúsh qoldanǵan joq.

3 qańtardan bastap narazylyq bildirýshiler basqa qalalarda jáne óńirlerde shyǵa bastady. Sol kúni Mańǵystaý oblysynyń turǵyndaryn qoldaý maqsatynda basqa jeti óńirde - Atyraý, Aqtóbe oblystary, Nur-Sultan, Almaty qalalary, BQO, Almaty oblysy men ShQO-da «beıbit» mıtıngter bastaldy.

4 qańtarda mıtıngter jalǵasty, al óńirler sany 11-ge jetti. Qatysýshylar sany 37 myń adamǵa deıin ósti. Almaty men Shymkentte qarýly shabýyldar jasaldy.

Qańtardaǵy oqıǵalardyń tolyq hronologııasymen myna siltemeden tanysýǵa bolady.