Qańtarda tártipsizdiktiń oryn alýyna múddeli toptardyń bolǵanyna kózimiz jetti – Abzal Quspan

NUR-SULTAN. QazAqparat – Qańtar oqıǵasy kezinde tártipsizdiktiń bolýyna múddeli toptardyń bolǵany jáne olardyń osy maqsatta jumys istegenine kózimiz jetti. Bul týraly belgili advokat Abzal Quspan aıtty, dep habarlaıdy QazAqparat tilshisi.

«Sońǵy birneshe apta kóleminde, komıssııa («Amanat» komıssııasy) óńirlerge shyqpaı-aq, óz jumysyn ortalyq memlekettik jáne quqyq qorǵaý organdary arqyly, júıeli túrde atqarýǵa kóshkenine nazarlaryńyzdy aýdaramyn. Osy atqarylǵan jumystar, respýblıka kóleminde sol «qańtar oqıǵalary» boıynsha jalpy kartınany bilýge jáne oǵan qatysty quqyq qorǵaý organdary tarapynan atqarylǵan jumystar men olardyń qyzmetindegi birqatar kemshilikter men jetistikteri týraly aldyn ala qorytyndy jasaýǵa múmkindik beredi. Birinshiden, qoǵamdy mazalaıtyn eń mańyzdy suraqtardyń biri – «Qańtar oqıǵasy» sııaqty qandy qyrǵyn qalaı boldy? Terrorızm boldy ma? Ony uıymdastyrýshylar boldy ma?» degen maǵynada, sol sebepti osy máseleler boıynsha qysqasha toqtalyp keteıin», - dedi A. Quspan Májilistiń jalpy otyrysynda.

Onyń aıtýynsha, barlyq óńirde sol jappaı tártipsizdkke qatysýshylarmen bolǵan kezdesý nátıjesinde bárine birdeı ortaq, mynadaı belgileri bary anyqtaldy:

- Jappaı tártipsizdiktiń bir kezeń, bir ýaqyt aralyǵynda bastalýy;

- Arandatýshy toptyń bolýy, olardyń ortaq, bir talaptarynyń bolýy, mysaly, barlyq jerde de beıbit mıtıngige shyqqan kópshilikti oblys, qala ákimshiligin basyp alýǵa úgitteýshilerdiń bolǵany;

- Jekelegen jaǵdaıda, quqyq qorǵaý organdarynyń ýaqytyly qımyldamaýy, keıde múldem áreketsizdik tanytýy;

- Ońtústik óńirlerde, beıbit mıtıngige qatysýshylar buryn ózderi kórmegen, tanymaıtyn áskerı tártipti, belgisiz adamdardyń bolǵany t.b.

«Bul jaǵdaılar, áý basta beıbit bastalǵan mıtıngilerdi jappaı tártipsizdikke ulastyrýǵa múddeli toptardyń bolǵany jáne olardyń ortalyqtandyrylǵan túrde, maqsatty jumys istegenine bizdiń kózimizdi jetkize tústi», - dedi A. Quspan.