Qańtarda tártip buzǵan 194 adamnyń jazasy jeńildedi

NUR-SULTAN. QazAqparat – Qańtar oqıǵalaryna qatysqan 194 adam bas bostandyǵynan aıyrýdy kózdemeıtin jazaǵa tartyldy. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

Onyń aıtýynsha, qańtar oqıǵalaryna qatysty sottar qaraǵan qylmystyq isterde 214 aıyptalýshynyń 194-i bas bostandyǵynan aıyrýdy kózdemeıtin jazalaý is-sharalaryna sottalǵan.

«Bostandyqqa jiberilgen adamdardyń kópshiligi Almaty qalasynyń enshisinde – 145, Almaty oblysynda – 38, Túrkistan oblysynda – 4-eý, Kóliktegi polıtsııa departamentinde – 5-eý, Jambyl men Aqmola oblystarynda 1 adamnan. Odan basqa Almaty qalasynda taǵy 6 adamǵa qatysty qylmystyq ister taraptardyń tatýlasýyna baılanysty qysqartyldy», - dedi Sanjar Ádilov Ortalyq kommýnıkatsııalar qyzmetindegi brıfıng barysynda.

Mysaly, onyń dereginshe, Almaty qalasynda bolǵan jappaı tártipsizdikter barysynda úsh adam «Korǵan» dúkeninen arnaıy kıim men ańshylyq pyshaqtaryn urlaǵan. Keıinnen kúdiktiler ustalynyp, kúzetpen ustaýǵa alyndy. Tergeý aıaqtalǵannan keıin qylmystyq is Almaty qalasy Almaly aýdanynyń sotyna joldandy.

«Kiná moıyndalǵandyqtan jáne keltirilgen zalaldyń orny toltyrylǵandyqtan sot kórsetilgen adamdardy 2 jylǵa bas bostandyǵynan aıyrýǵa sottady jáne sot zalynda olardy kúzetpen ustaýdan bosatty», - dedi ol.