Qańtarda memlekettik bıýdjet qarajatynyń 6 mlrd teńgesi únemdeldi - Álıhan Smaıylov

NUR-SULTAN. QazAqparat – 2020 jyldyń qańtarynda memlekettik bıýdjet qarajatynyń 6 mlrd teńgesi únemdeldi. Bul týraly Úkimet otyrysynda QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Memlekettik bıýdjettiń shyǵystary esepti kezeńde 1 trln 50 mlrd teńgeni qurady. Ótken jyldyń osyndaı kezeńimen salystyrǵanda olar 5,1 paıyzǵa ósti. Respýblıkalyq bıýdjet shyǵystary 1 trln 18 mlrd teńgege nemese 94,3 paıyzǵa atqaryldy. Bıýdjet qarajaty 61 mlrd teńgege atqarylmady. Onyń 6 mlrd teńgesi únemdeý boldy. Al ıgerilmeý somasy 55 mlrd teńgeni qurady», - dedi Álıhan Smaıylov.

Onyń atap ótýinshe, konkýrstyq rásimderdi uzaq jáne ýaqtyly ótkizbeý, oryndalǵan jumystar aktilerin ýaqtyly usynbaý, qazynashylyq organdaryna tirkeýge sharttar men qosymsha kelisimderdi kesh usyný ıgerilmeýdiń negizgi sebebi bolyp otyr.

«Jergilikti bıýdjetterdiń shyǵystary 213 mlrd teńgeni qurady. 36 mlrd teńge atqarylmady. Bıyl jergilikti bıýdjetterge beriletin nysanaly transfertterdiń jyldyq somasy 1 trln 526 mlrd teńgeni quraıdy. Esepti kezeńde olarǵa 18 mlrd teńge bólindi. Aldyn-ala derekter boıynsha olardyń 65,4 paıyzy, ıaǵnı 12 mlrd teńgesi ıgerildi. 6,2 mlrd teńge oryndalmaǵan, onyń ishinde 0,3 mlrd teńge únemdeý somasy boldy. 5,9 mlrd teńge ıgerilmegen», - dedi birinshi vıtse-premer.

Ol qarjylandyrý josparlaryna ózgerister engizýge, tólemniń negizdiligin rastaıtyn qujattardyń bolmaýyna, avanstyq tólem mólsheriniń azaıýyna jáne memlekettik ataýly áleýmettik kómek tóleýdiń erejesine ózgerister engizýge baılanysty qarajattyń ıgerilmegendigin atap ótti.

«Eń kóp ıgerilmegen qarajat Túrkistan oblysynda, Nur-Sultan qalasynda, Batys Qazaqstan oblystarynda qalyptasty», - dedi Álıhan Smaıylov.